حکومەتی کوردستان 420 ملیۆن دۆلار بۆ سلێمانی تەرخان دەکات

ئاڤا نیوز

 

دوای چاوەڕوانییەکی زۆر، هەنگاوە کردارییەکان بۆ دەستپێکردنی پڕۆژەی گەورەی هێڵی سێیەمی گواستنەوەی ئاو لە دووکانەوە بۆ سلێمانی دەستیان پێکردووە. ئەم پڕۆژە ستراتیژییە، کە بە گوژمەی 420 ملیۆن دۆلار جێبەجێ دەکرێت، ئامانجی چارەسەرکردنی کێشەی کەمئاوییە لە گەڕەکەکانی پارێزگای سلێمانی بۆ ماوەی 25 بۆ 30 ساڵی داهاتوو.

 

بۆچی گرنگە: شاری سلێمانی لە ساڵانی ڕابردوودا بەدەست کێشەی کەمئاوییەوە ناڵاندوویەتی، بە تایبەت لە وەرزی گەرمادا. ئەم پڕۆژەیە وەک چارەسەرێکی بنەڕەتی و درێژخایەن سەیر دەکرێت کە دابینکردنی ئاوی خاوێن بۆ ژمارەیەکی زۆری دانیشتووانی پارێزگاکە مسۆگەر دەکات. تەواوبوونی ئەم هێڵە نوێیە یارمەتیدەر دەبێت بۆ کەم کردنەوەی فشار لەسەر سەرچاوە ئاوییەکانی ئێستا و باشترکردنی خزمەتگوزارییە سەرەتاییەکان بۆ هاوڵاتیان.

زانیاریی ئاڤا: بەپێی زانیارییەکانی ئاڤا، ڕەزامەندیی ئەنجوومەنی وەزیرانی هەرێمی کوردستان بۆ جێبەجێکردنی پڕۆژەکە گەڕاوەتەوە وەزارەتی شارەوانی. بڕیارە هەفتەی داهاتوو گرێبەستی پڕۆژەکە بە فەرمی لەگەڵ کۆمپانیای جێبەجێکار واژۆ بکرێت و لە ماوەی کەمتر لە مانگێکدا دەست بە کارەکانی جێبەجێکردن بکرێت.

-پڕۆژەکە بە ماوەی ساڵ و نیوێک (18 مانگ) تەواو دەکرێت. وێستگەی پاڵاوتنی ئاو لەم پڕۆژەیەدا توانای پاڵاوتنی 20 هەزار مەتر سێجا ئاوی خاوێنی لە کاتژمێرێکدا دەبێت، بەمەش ڕۆژانە نزیکەی 480 هەزار مەتر سێجا ئاو بۆ سنووری پارێزگای سلێمانی دابین دەکات.

-لەڕووی جۆر و کوالێتییەوە، پڕۆژەکە هاوشێوەی پڕۆژەی فریاگوزاریی خێرای ئاوی هەولێرە، کە بە ستانداردێکی بەرزی نێودەوڵەتی جێبەجێ دەکرێت.