هێزەکانی سەر بە حکومەتی سووریا هێرش دەکەنە سەر هەسەدە

ئاڤا نیوز

 

گرووپە چەکدارەکانی سەر بە حکومەتی سووریا لە ڕێگەی درۆنەوە هێرشیان کردە سەر دوو خاڵی هێزەکانی سوریای دیموکرات "هەسەدە" لە شارۆچکەی دێر حافر لە ڕۆژهەڵاتی حەلەب، لە ئەنجامی ئەم هێرشەدا سێ شەڕڤانی هەسەدە بریندار بوون.

 

ئەوەی پێویستە بیزانیت: دوو ڕۆژ لەمەوبەر بە هەمان شێوە شەڕ و پێکدادان لەنێوان گرووپەکانی سەر بە حکومەتی سووریا و هەسەدە دروستبوو، ئەوکات هەسەدە ڕایگەیاندبوو گرووپەکانی سەر بە حکومەتی سووریا بۆردوومانی ناوچەیەکی پارێزگای حەلەبیان کردووە و هەشت کەس گیانیان لەدەستدا و چوار کەسی دیکەش برینداربوون.

 

بڵاوکراوەی فەرمی: بەگوێرەی ڕوانگەی سووری، ئێوارەی ڕۆژی سێشەممە چەکدارانی سەر حکومەتی کاتیی سووریا لەڕێگەی دوو هێرشی یەک بەدوای یەک لەڕێگەی فڕۆکەی بێفڕۆکەوانەوە هێرشیان کردە سەر دوو خاڵی هێزەکانی سووریای دیموکرات، لە شارۆچکەی دێر حافر لە ڕۆژهەڵاتی حەلەب. بەهۆیەوە سێ شەڕڤانی سەر بە هێزەکانی سووریای دیموکرات بریندار بوون.

 

لەلایەکی دیکەوە: چەکدارانی حکومەتی سووریا دوای نیوەڕۆی ڕۆژی سێشەممە، گوندی زوبەیدەیان لە دێر حافر لە ڕۆژهەڵاتی حەلەب، بە چەکی قورس تۆپباران کرد، بە هۆیەوە چوار منداڵ برینداربوون.