ژنەکەی ترەمپ ڕەتی کردووەتەوە لەگەڵ ژنەکەی زێلێنسکی کۆببێتەوە

ئاڤا نیوز

 

سەرەڕای پێداگرییەکانی خانمی یەکەمی ئۆکراینا بۆ بینینی خانمی یەکەمی ئەمریکا بەڵام تاوەکو ئێستا چاویان بەیەکتری نەکەوتووە و تەنانەت چەندین جار ئەم داواییەی ڕەت کراوەتەوە.

 

زانیاریی بەدەستهاتوو: ئۆلێنا زێلێنسکا هاوژینی ڤۆلۆدیمێر زێلێنسکی، سەرۆکی ئۆکراینا لە پەراوێزی کۆبوونەوەی گشتیی نەتەوەیەکگرتووەکان داوای دیدارێکی لە مێلانیا ترەمپ، هاوژینی دۆناڵد ترەمپ، سەرۆکی ئەمریکا کردووە بەڵام ڕەتکراوەتەوە.

 
ئەوەی لەبارەیەوە دەگوترێت: مارک بێکمان، ڕاوێژکاری باڵای مێلانیا وتی،"خاتوو زێلێنسکا چەندین جار داوای کۆبوونەوەی مێلانیا کردووە، بەڵام هیچ کۆبوونەوەیەکی دوولایەنە نابێت، هیچ شتێکی فەرمی ڕوونادات، دەکرێت سڵاوکردن لەنێوان هەردووکیان هەبێت بەڵام هیچ گفتوگۆیەکی تەواو نابێت، هیچ کۆبوونەوەیەک پلانی بۆ دانەنراوە.''

 

لەلایەکی دیکەوە: لە پەراوێزی کۆبوونەوەکانی نەتەوەیەکگرتووەکان لە نیویۆرک، دۆناڵد ترەمپ، سەرۆکی ئەمریکا و ڤۆلۆدیمیر زێلێنسکی، سەرۆکی ئۆکراینا کۆبوونەوە، پرسی سەرەکیی بەردەوامیی شەڕی نێوان ڕووسیا و ئۆکراینا و هەوڵدان بۆ دۆزینەوەی چارەسەر و گەیشتن بە ئاگربەست بوو.

 

زانیاریی زیاتر: پێشتر مێلانیا نامەیەکی بۆ ڤلادیمێر پووتین، سەرۆکی ڕووسیا نارد و داوای لێکرد لە هێرشەکاندا سەلامەتی منداڵان لەبەرچاو بگرێت، دواتر لە مانگی ئاب زێلێنسکی نامەیەکی خانمی ئۆکراینیای پێشکەش بە ترەمپ کرد بۆ ئەوەی بیدات بە خانمی یەکەمی ئەمریکا. لە نامەکەدا سوپاسی هەڵوێستی مێلانیای کرد بەرامبەر بە منداڵە ئۆکراینییەکان.