حکومەتی هەرێمی کوردستان وادەی هەناردەکردنەوەی نەوتی ڕاگەیاند

ئاڤا نیوز

 

سكرتێری ئەنجوومەنی وەزیرانی هەرێمی كوردستان ڕایدەگەیەنێت، بەپێی ڕێككەوتنە سێقۆڵییەكە، بڕیارە كاتژمێر 6:00ـی بەیانی ڕۆژی شەممە 27ـی ئەیلوولی 2025، نەوتی هەرێمی كوردستان لەڕێگەی بۆڕی نەوتی هەرێم-جەیهان جارێكی دیكە بگاتەوە بازاڕی جیهانی و لەلایەن كۆمپانیا سۆمۆ بەبازاڕ بكرێت.

چیرۆكی سەرەكی: ئەمڕۆ پێنجشەممە، سەرۆکوەزیرانی کوردستان و سەرۆکوەزیرانی عێراق، هاوکات وەزارەتی سامانە سروشتییەکان و وەزارەتی نەوتی عێراق لەبارەی هەناردەکردنەوەی نەوتی کوردستان ڕاگەیێنراویان بڵاوکردەوە.

لێدوانی فەرمی: د.ئامانج ڕەحیم، سكرتێری ئەنجوومەنی وەزیرانی هەرێمی كوردستان ڕایگەیاند، "وا بڕیارە کاتژمێری 6:00ـی بەیانیی ڕۆژی شەممە، 27ـی ئەیلوولی 2025، نەوتی هەرێمی کوردستان لە ڕێگای بۆریی نەوتی هەرێم - جەیهان، جارێکی دیکە بگاتەوە بازاڕی جیهانیی و لە لایەن کۆمپانیای سۆمۆوە بەبازاڕ بکرێت و داهاتەکەی بگەڕێتەوە بۆ خەزێنەی فیدڕاڵیی، سەرەڕای پێدانی مانگانەی بەشی گەنجینەی فیدڕاڵیی لە داهاتە نانەوتییەکانی هەرێم، بەم جۆرەش هەرێم بەشدار دەبێت لە زیادکردنی داهاتی گەنجینەی فیدڕاڵیی عێراق و جارێکی دیکە لە بوودجەی گشتی عێراقەوە تەرخان دەکرێتەوە بۆ دابینکردنی مووچە و شایستەکانی هەرێم".

د.ئامانج ڕەحیم ئامانەشی ڕاگەیاندووە:

- ڕێکكەوتنی هەناردەكردنەوەی نەوتی هەرێمی كوردستان، لە شەش ماددەی سەرەکی و پێشەکییەک پێکهاتووە، لە لایەن وەزارەتی نەوتی عێراق و وەزارەتی سامانە سروشتییەکان و کۆمپانیا نەوتییەکان واژۆ كراوە و تێیدا؛ ماف و شایستە و پابەندییەکانی هەر سێ لایەن دەستنیشانکراوە.

- هیواخوازم ئەم رێككەوتنە ببێتە مایەی سەقامگیری لە خەرجكردنی مووچەی و شایستەكانی هەرێم و، كۆتاییهاتنی نەهامەتی و چاوەڕوانیی مووچەخۆران بۆ وەرگرتنی شایستەكانی خۆیان لەكاتی خۆیدا، كە دەبوو هەر لە سەرەتاوە، مووچە بەدوور بێت لەم ناكۆكیانە.