هۆشداری لە بڵاوبوونەوەی دۆلار و دیناری ساختە لە بازاڕەكانی كوردستان دەدرێت

ئاڤا نیوز

ئاسایشی ڕاپەڕین ڕایدەگەیێنێت، لە چەند ڕۆژی ڕابردوودا ژمارەیەک هاونیشتمانی سکاڵایان تۆمارکردووە کە پارەی ساختەیان بەدەست گەیشتووە، ئەندامێكی ئەنجوومەنی بازاڕی دۆلارفرۆشانی هەولێریش دەڵێت: ڕۆژانە دۆلاری ساختە هەیە، بەڵام ئەوانەی بەڕێژەیەکی زۆر دۆلاری ساختەیان لایە، نایەن بۆ بازاڕی دۆلارفرۆشان، بەڵکو لە بەنزیخانە و مارکێتەکان ساغی دەکەنەوە.

ڕاگەیێنراوی فەرمی: ڕۆژی پێنجشەممە 25ـی ئەیلوول، بەڕێوەبەرایەتیی ئاسایشی ڕاپەڕین، لە ڕاگەیێنراوێكدا هاونیشتمانیان و پیشەوەران و كاسبكاران ئاگادار دەکاتەوە لەوەی كە تەنیا لەم هەفتەیەدا، سكاڵای دوو حاڵەتی وەرگرتنی 25 هەزار دیناریی ساختەیان بەدەست گەیشتووە.

ئاسایشی ڕاپەڕین داوا لە هاونیشتمانیان دەکات، بە وریاییەوە مامەڵەکانیان بکەن و لەهەبوونی گومان لەهەر کەسێک کە ئەم پارە ساختەیە بڵاو دەکەنەوە، بەزووترین کات ئاسایشی ناوچەکەیان ئاگاداربکەنەوە.
لێدوانی فەرمی: ئەحمەد ئیبراهیم، ئەنجومەنی بازاڕی دۆلارفرۆشانی ڕانیە بە ئاڤا میدیای وت، ئەو پارە ساختەیەی دێتە ناو بازاڕی دۆلارفرۆشانی ڕانیە، زیاتر پارە عێراقییە و نازانین لە کوێوەوە دێت. ڕۆژی وا هەیە لە 25 ملیۆن دینار پێنج دانە لە 50 هەزار و 10 هەزاری دەدۆزرێتەوە. ئەو کەسەی دەیهێنێت خۆی پارەکە ساختە ناکات بەڵکو ئەویش وەریگرتووە.

لەلایەکی دیکەوە: غازی جەعفەر، ئەندامی ئەنجومەنی بازاڕی دۆلارەکەی هەولێر بە ئاڤا میدیای وت، هەبوونی دۆلار و دیناری ساختە بەردەوام هەبووە و ئێستاش هەیە، بەڵام لەبەرئەوەی لە بازاڕی دۆلارەکەی هەولێر و شارەکانی تریش ئامێری پێشکەوتوو هەیە، هاوکات ئەزموونی ئەوانەی لەم بوارە کاردەکەن ڕۆڵی هەیە لەوەی بە ئاسانی دەربکەوێت کامە دۆلار و دینار ساختەیە. لەگەڵ ئەوەشدا لە بازاڕی دۆلار ئاسایشێکی بەهێز هەیە و ئەوانەی دۆلاری ساختەیان لایە ناوێرن ڕوو لە بازاڕی دۆلار بکەن. بەڵکو زیاتر ئەو کەسانە لە مارکێت و بەنزیخانەکان ساغی دەکەنەوە. 

غازی جەعفەر دەشڵێت: ڕۆژانە 100 دۆلاری و 50 دۆلاری ساختە دەبینرێت، بەڵام لە چەند شەدەیەک دۆلار تەنیا دانەیەکی تێدایە و ئەویش ئەو کەسەی هێناویەتی نایزانێ. هاوکات پارەی عێراقی ساختەش هەیە لە جۆری 10 هەزار و 25 هەزاری و 50 هەزاری.

پەیوەست بەم بابەتە: نووسینگەكانی نەهێشتنی تاوانی ساختەكاری لە شارەكانی هەرێمی كوردستان، بەردەوام هەڵمەتی هۆشیاركردنەوە بە هاونیشتمانیان دەدەن كە لەكاتی مامەڵەكردن چاوكراوە بن، لەو چوارچێوەیەشدا بەهەماهەنگی لەگەڵ وەزارەتی دارایی و ئابووری، خولی پراكتیكی و هۆشیاری بۆ خەزنەدارانی بانكەكان دەكەنەوە، هاوكات پلان هەیە خولی هۆشیاری بۆ فەرمانگە، نووسینگە و كۆمپانیاكانی ئاڵوگۆڕی دراو بكرێتەوە.