هاتووچۆی هەولێر بەر لە دەستپێکی بانگەشەی هەوڵبژاردن چەند ڕێنماییەک بڵاودەکاتەوە

ئاڤا نیوز

بەڕێوەبەرایەتیی هاتووچۆی هەولێر ڕێنماییەکانی بانگەشەی هەڵبژاردن بۆ شاری هەولێر بڵاودەکاتەوە. بەپێی ڕێنماییەکە هەڵواسینی پۆستەری کاندیدەکان لە هەندێک شوێن قەدەغە دەکرێت.

وێنە گەورەکە: کاتژمێر 12ـی ئەمشەو بانگەشەی هەڵبژاردنی ئەنجوومەنی نوێنەران دەستپێدەکات. هاتووچۆی هەولێر کۆمەڵێک ڕێنمایی بڵاوکردوەتەوە و هاوکات پارێزگای هەولێریش کۆمەڵێک ڕێنمایی بۆ بەڕێوەچوونی بانگەشەی هەڵبژاردن بڵاوکردوەتەوە.

لێدوانی فەرمی: عەقید هێمن حمەدەمین، وتەبێژی هاتووچۆی هەولێر، بە ئاڤا میدیای ڕاگەیاند، بەهۆی دەستپێکردنی وادەی بانگەشەی هەڵبژاردنی پەرلەمانی عێراق، داوا لەسەرجەم لیست و ڕەوت و لایەنە سیاسی و بەربژێرەکانی بەشدار لەهەڵبژاردن دەکەین کە لەو ماوەیەی ڕێگەپێدراوە بۆ بانگەشەکردن، ڕەچاوی ئەم ڕێنماییانە بکەن:

- وێنە و پۆستەری بەربژێرەکان و بڵاوکراوەکانیان بە ستونەکانی ترافیک لایت و هێماکانی هاتووچۆ هەڵنەواسن و وێنەی گەورە لەنزیک سوڕانەوەکان و سەر شۆستەی چوار ڕیانەکان دانەنێن کەببێتە هۆکاری بەربەستی بینین لەبەردەم شوفێران.

- داوا لە کاندیدەکان دەکەین پۆستەرە گەورەکان بەباشی بچەسپێنن بۆ ئەوەی بەهۆی ڕەشەباوە بەرنەبنەوە سەر شەقامەکان و زیان بە ئۆتۆمبێل و بەکارهێنەرانی شەقام نەگەێنن.

- جامی ئۆتۆمبێل و ژمارەی تابلۆ دانەپۆشن بە ئاڵا و لۆگۆ و وێنەی بەربژێرەکان.

- داوا لە  بانگەشەکاران دەکەین لەدواوەی ئۆتۆمبێلی بارهەڵگر سەرنەکەون و جەستەیان لە جام و سلایدی ئۆتۆمبێلەکان نەهێننەدەرەوە.

-  ڕێگاو شەقامەگشتیەکان نەگرن  لەپێناو و دروست نەبوونی جەنجاڵی هاتووچۆ و پاراستن و سەلامەتی گیانیان و ڕونەدانی ڕووداوی هاتووچۆی نەخوازراو.

- دەخوازین وادەی بانگەشە کە لە کەشێکی هێمن و دیموکراسیدا بەڕێوە بچێت دوور لە سەرپێچی یاسا و ڕێنمایەکانی هاتووچۆ.