حیزبوڵڵای لوبنان هەڵوێستی خۆی لەبارەی پلانی ترەمپ بۆ ئاگربەستی غەززە ئاشکرا دەکات

ئاڤا نیوز

 

ڕۆژی شەممە، نەعیم قاسم، ئەمینداری گشتیی حیزبوڵڵای لوبنان ڕایگەیاند، پلانی ئەمریکا بۆ ڕاگرتنی شەڕی غەززە دەستکاری کراوە بۆ خزمەتی بەرژەوەندییەکانی ئیسرائیل.

 

وێنە گەورەکە: ئێوارەی ڕۆژی هەینی، حەماس ڕێککەوتنی خۆی بۆ ئازادکردنی سەرجەم زیندانیانی ئیسرائیل و ڕادەستکردنی کەرتی غەززە بە دەسەڵاتێکی سەربەخۆی فەڵەستینی ڕاگەیاند، حیزبوڵڵای لوبنان کە سەر بە ئێرانە و لە ساڵی ڕابردوو شەڕێکی خوێناویی لەگەڵ ئیسرائیل کرد، بە گومانە لە پلانەکەی ترەمپ و بە بەشێک لە پلانی "ئیسرائیلی گەورە" ناوی دەبات.

 

ڕاگەیێنراوی فەرمی: نەعیم قاسم ڕایگەیاند: ئیسرائیل لە چوارچێوەی پلانی گەورەی ئیسرائیلدا کار دەکات، ئەمریکاش بە تەواوی پشتیوانی لێدەکات، هەموو پلانێک بەشێکە لەو پلانە، هەر کشانەوەیەکیش کشانەوەیەکی تاکتیکییە بە چاوەڕوانی بارودۆخێکی باشتر.

 

نەعیم جەختی لەوە کردەوە کە "ئەوەی لە غەززە ڕوودەدات بەشێکە لە پرۆژەی ئیسرائیلی گەورە و هەر پاشەکشەیەک یان کشانەوەیەک لە هەنگاوێکی تاکتیکی زیاتر نییە کە بارودۆخەکە سەپاندوویەتی". ئاماژەی بەمەش کرد، "چاوەڕێی ئەو دەرئەنجامە دەکەین کە فەڵەستینییەکان لە مامەڵەکردن لەگەڵ پلانەکەدا پێی دەگەن، بەڵام دەزانین تەسلیمبوون لە فەرهەنگەکەیاندا نییە".

 

ئەوەی پێویستە بیزانیت: ناوبراو لە درێژەی قسەکانیدا وتی: "پلانەکەی ترەمپ هەوڵدەدات هێز لە گرووپە چەکدارەکان بسەنێتەوە کە لە ڕاستیدا پلانێکی ئیسرائیلییە بە جلوبەرگی ئەمریکییەوە"، ئاماژەی بەوەشکرد، ترەمپ لەم کاتەدا پلانەکەی پێشنیاز کردووە بۆ "بێ تاوانکردنی ئیسرائیل لەبەرامبەر شەپۆلی ئیدانەکردنی جیهانیدا"، زۆربەی وڵاتانی جیهان پشتیوانی لە دامەزراندنی دەوڵەتی فەڵەستین دەکەن و دژایەتی جینۆساید دەکەن.