لیژنەی یاسایی: ئەم خولەی پەرلەمانی عێراق تا سەرەتای ساڵی 2026 بەردەوام دەبێت

ئاڤا نیوز

 

سەرۆکی لیژنەی یاسایی لە  پەرلەمانی عێراق دەڵێت، هەڵوەشاندنەوەی خولی ئێستای پەرلەمان بەهیچ شێوەیەک لە ئارادا نییە و بەگوێرەی یاساش، ئەم خولەی پەرلەمانی عێراق تا 8-1-2026 بە هەموو دەسەڵاتەکانییەوە لە یاسادانان بەردەوام دەبێت.

 

وێنە گەورەکە: پەرلەمانی عێراق 9-1-2022 یەکەمین کۆبوونەوەی ئەنجام دا و بەگوێرەی یاساش ماوەی خولی پەرلەمان چوار ساڵی تەقویمییە، بەوپێیەش تا 8-1-2026 لە کارەکانی بەردەوام دەبێت، بڕیارە ڕۆژی 11ی مانگی داهاتووش هەڵبژاردن بۆ خولی تازەی پەرلەمان بکرێت.

 

لێدوانی فەرمی: ڕێبوار هادی، سەرۆکی لیژنەی یاسایی لە  پەرلەمانی عێراق بە ئاژانسی هەواڵی فەرمیی عێراقی ڕایگەیاند، پەرلەمان تا 8-1-2026 بە هەموو دەسەڵاتەکانییەوە لە یاسادانان بەردەوام دەبێت، هەڵوەشاندنەوەی ئەم خولەی پەرلەمانیش لە ئارادا نییە و کاتی پێویستیش بۆ هەڵوەشاندنەوەی پەرلەمان نەماوە.

 

ئەو مانایە دەگەیێنێت: بەگوێرەی ماددەی 49ـی دەستوور 45 ڕۆژ پێش کۆتاییهاتنی خولی پەرلەمان پێویست دەکات هەڵبژاردن بۆ خولێکی نوێ بکرێت، بەوپێیەش ڕۆژێک دوای کۆتاییهاتنی ئەم خولەی پەرلەمان، دەکرێت خولی نوێی پەرلەمان لە 9-1-2026 سوێندی یاسایی بخوات و ڕێکارەکانی هەڵبژاردنی دەستەی سەرۆکایەتیی و پێکهێنانی حکومەت دەست پێ بکات.