ئاگادارییەک لە کۆمیسیۆنەوە بۆ لایەنەکان؛ بانگەشە بەم شێوازە و لەم شوێنانە قەدەغەیە

ئاڤا نیوز

کۆمیسیۆنی هەڵبژاردنەکانی عێراق دەڵێت، دانانی پۆستەری بانگەشەی هەڵبژاردن بەکارهێنانی سیکۆتین و چیمەنتۆ و دانانی لەسەر هێماکانی هاتووچۆ و مزگەوت و دامەزراوە گشتییەکان قەدەغەیە و سەرپێچیکاران بە پێبژاردنی دارایی سزا دەدرێن.

 

وێنە گەورەکە: ئەمڕۆ سێیەمین ڕۆژی بانگەشەی هەڵبژاردنە بۆ پەرلەمانی عێراق کە بڕیارە 11ی مانگی داهاتوو بەڕێوەبچێت، بۆ هەڵبژاردنی ئەمجارە و کێبرکێ لەسەر 329 کورسییەکەی پەرلەمان، حەوت هەزار و 768 کەس خۆیان کاندید کردووە.

 

ڕاگەیێنراوی فەرمی: کۆمیسیۆنی هەڵبژاردنەکانی عێراق گشتاندنی بە نوسراوێکی ئەمیندارییەتی بەغدا کردووە بۆ چۆنییەتی ئەنجامدانی بانگەشەی هەڵبژاردنی کاندید و حیزب و هاوپەیمانێتییەکان و ئاماژەی بەوەشداوە، لەکاتی بەکارهێنانی پۆستەری بانگەشە نابێت بە سیکۆتین بە دیوارەوە بلکێنرێت، چونکە دواتر لێی نابێتەوە، هەروەها نابێت پۆستەری بانگەشە بە چیمەنتۆ بەزەوییەوە قایم بکرێت، نابێت لەسەر هێماکانی هاتووچۆش دابنرێت.

 

هەر بەگوێرەی ڕێنماییەکە، نابێت لە دیواری باڵەخانەی حکومی، مزگەوت، حوسێنیە، قوتابخانە، پرد، ناوچەی شوێنەواری و پەیکەری کەسایەتییەکان لە شوێنە گشتییەکان پۆستەری بانگەشە هەڵبواسرێت، باشتریش وایە بانگەشە لەو کەرەستانە دروست بکرێت کە دوای بانگەشە لێکردنەوەیان ئاسان بێت یانیش ڕێگەی لەوانەش تۆڕە کۆمەڵایەتییەکان بۆ بانگەشە بەکاربهێنرێن.

 

ئەمەش بزانە: ئەمیندارییەتی بەغدا لە نوسراوەکەیدا هۆشداری داوە و دەشڵێت، هەر پۆستەرێکی بانگەشە پێچەوانەی ئەم ڕێنماییانە دابنرێت لەلایەن شارەوانییەوە لادەبرێت و بە پێبژاردنی داراییش سزای کاندید و حیزب و هاوپەیمانێتییەکە دەدرێت، ئەویش بەجۆرێک نوسراو ئاڕاستەی کۆمیسیۆن دەکەن و لەو پارەیە دەبڕدرێت کە لایەنەکان لای کۆمیسیۆن وەک بارمتە (تەئمین) دایانناوە.