چەند پەیامێکی نوێ لە سەرۆکوەزیران مەسرور بارزانییەوە بۆ گەنجان

ئاڤا نیوز

سەرۆکوەزیران مەسرور بارزانی لە تێدێکس نیشتمان چەند پەیامێکی ئاراستەی گەنجان کرد و پێی گوتن: پێش هەموو شتێک وڵاتی خۆتان خۆش بوێت.

چیرۆکی سەرەکی: ڕۆژی یەکشەممە بە ئامادەبوونی سەرۆکوەزیران مەسرور بارزانی چالاکییەکانی تێدێکس نیشتمان دەستیپێکرد، لە تێدێکسی ئەمجارە 10 وتاربێژ پەیامی جیاوازیان دەبێت لەو ژمارەیەش سێ کەسیان بیانین.

لێدوانی فەرمی: سەرۆکوەزیران مەسرور بارزانی لە تێدێکس نیشتمان ڕایگەیاند: ڕووبەڕووی هەموو ئاڵانگارییەکان بووینەوە و قەیرانەکانمان تێپەڕاند و لە چەندین بواریشدا سەرکەوتوو بووین.

سەرۆکوەزیران مەسرور بارزانی لە بەشێکی دیکەی قسەکانیدا ڕایگەیاند: زۆر لایەن لە هەوڵدابوون بەربەست بۆ کارەکانمان دروست بکەن و ساردمان بکەنەوە لە ئەرکەکانمان، ڕێگری و دروستکردنی فشاری ئابووری و بڕینی بودجە یەکێک بوو لە ڕێگەکان بەڵام بەسەر هەموویاندا زاڵبووین.

زانیاریی زیاتر: لەبارەی بڕوا بەخۆبوون و خۆشەویستی بۆ نیشتمان، سەرۆکوەزیران وتی، "بەر لەوەی بێمە ئەم چالاکییە، دوو گەنج ڕێگەیان پێگرتم و وتیان ئەگەر دوو ئامۆژگاریمان بکەیت، ئامۆژگارییەکان چی دەبن، وتم، یەکەم ئامۆژگاریم ئەوەیە وڵاتتان خۆش بوێت، دووەم ئامۆژگاریم ئەوەیە باوەڕتان بە خۆتان بێت."

بەشێکی دیکەی وتەکانی سەرۆکوەزیران مەسرور بارزانی:-

٠ بەرامبەر بەو نیشتمانپەروەری و خۆشەویستییە بۆ وڵات لەلایەن گەنجانەوە، هێزێکی تری نامۆ لە هەوڵ دابووە گەنجەکانمان نائومێد بکەن و ڕوو لە هەندەران بکەن، بڕوایان بە وڵاتی خۆیان نەمێنێت و خۆشەویستیان بۆ خاک و نیشتمان نەمێنێت.

٠ وەڵامی ئێمە بۆ ئەوانەی کە دەیانەوێت گەنج و وڵات لەیەکتر داببڕن ئەوەیە، کە گەنجەکانمان زیاتر لە هەموو کەسێک قەدری ئەم خاکە دەزانن، چونکە دەزانن بست بە بستی ئەم خاکە شوێنی خوێنی شەهیدەکانمانن، بست بە بستی ئەم خاکە پیرۆزە.

٠ داوا لە گەنجان دەکەم متمانەیان بەخۆیان هەبێت و پێش هەموو شتێک وڵاتی خۆتان خۆش بوێت.

٠ کارێکی وامانکردووە کە جووتیاران بگەڕێنەوە سەر زەوییەکانیان و بەرهەمی ناوخۆ هەناردە بکەن.

٠ ڕێگەمان بۆ گەنجان خۆشکردووە بێن خزمەت بکەن و دەستیان هەبێت لە ئاوەدانکردنەوە وڵاتەکەیان، ئەوەی ئێستا هەیە بەرهەمی ماندووبوونی گەنجەکانمانە.