سەرۆکوەزیران مەسرور بارزانی 29  قوتابخانەی نوێ دەکاتەوە

ئاڤا نیوز

پێشنیوەڕۆی ئەمڕۆ چوارشەممە سەرۆکوەزیران مەسرور بارزانی 29 قوتابخانە و باخچەی منداڵانی نوێی حکومی دەکاتەوە، کە سەرجەم قۆناغەکانی خوێندن لە خۆدەگرن.

 

وێنە گەورەکە: لەماوەی کابینەی نۆیەمی حکومەتی هەرێمی کوردستان 214 باخچەی منداڵان و قوتابخانە دروستکراون و هەزار 670 ـی دیکە نۆژەنکراونەتەوە، جگە لەوەی 629 ژووری نوێ لەنێو قوتابخانەکان دروستکراوە، بەشێوەیەکی گشتیی شوێنی نوێ بۆ 110 هەزار قوتابی دروستکراوە.

 

لێدوانی فەرمی: لوقمان سەعید، بەڕێوەبەری گشتیی پەروەردەی هەولێر بە ئاڤای گوت، "ئەمڕۆ لە قوتابخانەیەکی حکومی کە دەکەوێتە گوندی ئارام دوو لە شاری هەولێر، سەرۆکوەزیران مەسرور بارزانی قردێلەی کردنەوەی 29 قوتابخانە و باخچەی منداڵان دەبڕێت، لەو 29 قوتابخانە و باخچەیە 13یان لە سنووری پارێزگای هەولێر دەبن، ئەوانی دیکە بەسەر ناوچەکانی دیکە دابەش دەکرێن."

 

زانیاریی زیاتر: ئەو قوتابخانەی ئەمڕۆ سەرۆکوەزیران قردێلەی کردنەوەی قوتابخانە و باخچە نوێیە حکومییەکانی لێدەبڕێت نۆ پۆلییە و 480 قوتابی وەردەگرێت.

 

ئەمەش بزانە: لەو 29 باڵەخانەیە ( 4 باخچە و 25 قوتابخانە)ی حکومی نوێ لەخۆدەگرێت.