ئەردۆغان: پێویستە هەسەدە خۆیان تێکەڵ بە دامەزراوەکانی سووریا بکەن

ئاڤا نیوز

سەرۆککۆماری تورکیا، جەختی لەسەر پێویستی پابەندبوونی هێزەکانی سووریای دیموکرات 'هەسەدە' بە بەڵێنەکانیان و تەواوکردنی پرۆسەی یەکگرتن لەگەڵ حکومەتی سووریا کردەوە.

 

چیرۆکی سەرەکی: ڕەجەب تەیب ئەردۆغان، سەرۆککۆماری تورکیا، لە لێدوانێکدا بۆ ڕۆژنامەنووسان لە کاتی گەڕانەوەی لە ئازەربایجان، کە نووسینگەکەی ڕۆژی چوارشەممە بڵاوی کردەوە، تیشکی خستە سەر چەند بابەتێکی پەیوەست بە تورکیا، سووریا، فەلەستین و چەند پرسێکی دیکە.

 

لێدوانی ڕۆژنامەوانی: ڕەجەب تەیب ئەردۆغان، پەیوەست بە دۆخی سووریا ڕایگەیاند: "هێزەکانی سووریای دیموکرات دەبێت بە وەفا بن بەرامبەر بەڵێنەکانیان و پێویستە خۆیان بە تەواوی لەگەڵ سووریا یەکبخەن".

 

ئەوەی پێویستە بیزانیت: ئەو لێدوانەی سەرۆککۆماری تورکیا لە کاتێکدایە ڕۆژی سێشەممە ئەحمەد شەرع، سەرۆکی سووریا، لەگەڵ مەزڵووم عەبدی، فەرماندی گشتی هێزەکانی هەسەدە، بە ئامادەبوونی تۆم باراک، نێردەی ئەمریکا و براد کووپەر، فەرماندەی فەرماندەیی ناوەندیی ئەمریکا کۆبووەوە. لە کۆبوونەوەکە تیشک خرایە سەر میکانزمی جێبەجێکردنی ڕێککەوتنی 10ـی ئازار.