بەڕێوەبەرایەتیی خۆسەر وردەکاریی کۆبوونەوەی مەزڵووم عەبدی و ئەحمەد شەرع ئاشکرا دەکات

ئاڤا نیوز

 

بەڕێوەبەرایەتیی خۆسەر لە باکوور و باکووری ڕۆژهەڵاتی سووریا وردەکارییەکانی کۆبوونەوەی شاندەکەی و سەرۆکایەتیی سووریای لە دیمەشق بڵاوکردەوە، جەختی لەوە کردەوە کە گفتوگۆکان لەسەر چوار خاڵی سەرەکی چڕبوونەتەوە و هیچ بەڵگەنامەیەکی فەرمی واژۆ نەکراوە.

 

چیرۆکی سەرەکی: دیمەشقی پایتەختی سووریا، ئەمڕۆ سێشەممە، چالاکییەکی دیپلۆماسی چڕی بەخۆیەوە بینی کە بریتی بوو لە کۆبوونەوەی ئەحمەد شەرع، سەرۆکی سووریا، لەگەڵ مەزڵووم عەبدی، فەرماندی گشتی هێزەکانی هەسەدە، بە ئامادەبوونی تۆم باراک، نێردەی ئەمریکا و براد کووپەر، فەرماندەی فەرماندەیی ناوەندیی ئەمریکا.

 

ڕاگەیێنراوی فەرمی: بەڕێوەبەرایەتیی خۆسەر لە ڕاگەیێنراوێکدا ئاماژەی بەوەدا، گفتوگۆکان لەسەر بنەمای یەکخستنی هێزەکانی سووریای دیموکرات 'هەسەدە' و ئاسایشی ناوخۆیی بوون، ئەم ڕێککەوتنە زارەکییە دەتوانێت ببێتە هۆی سوپایەکی ڕێکخراو و کارا کە پارێزگاری لە سوورییەکان بکات.

 

زانیاریی زیاتر: ڕاگەیێندراوەکە جەختی لەسەر گەیشتن بە وەستاندنی تەواو و دەستبەجێی ئاگربەست لە باکوور و باکووری ڕۆژهەڵاتی سووریا و حەلەب کردەوە و ئاماژەی بەوەدا، "پێویستە هەموو سوروییەکان لە وڵاتێکی ئارامدا بژین".

 

لەهەمان کاتدا: سەبارەت بە دەستووری سووریا، کە خاڵێکی ناکۆکییە لە نێوان بەڕێوەبەرایەتی خۆسەر و حکومەتی دیمەشق، لە ڕاگەیێنراوەکەدا ئاماژە بۆ ئەوە کراوە "دەستووری سووریا هەموار دەکرێتەوە. ئەم خاڵە بەڕاستی گرنگە، چونکە دەستووری هەر وڵاتێک پێویستە نوێنەرایەتیی هەموو دانیشتووانەکەی بکات و پارێزگاری لە هەر تاکێک بکات".

 

لەلایەکی دیکەوە: هەر بەگوێرەی ڕاگەیێنراوەکە، گفتوگۆکان گەڕانەوەی ئاوارەکان و ڕێگاکانی بەرەنگاربوونەوەی تیرۆر و پرسە سەرەکییەکان بۆ دڵنیابوون لە سەقامگیری و ئاشتی هەمیشەیی لە سووریادا لەخۆگرتبوو.

 

ئەوەی لەبارەیەوە دەگوترێت: تۆم باراک، نێردەی ئەمریکا بۆ سووریا لە چاوپێکەوتنێکی تایبەتدا لەگەڵ کەناڵی "عەرەبییەی ئینگلیزی" ڕایگەیاند، کۆبوونەوەیەکی بونیادنەرانەمان لە نێوان هەردوولادا ئەنجامدا و جەختمان لەسەر پێویستی پابەندبوون بە جێبەجێکردنی ڕێککەوتنی 10ـی ئازار بۆ سەرۆک ئەحمەد شەرع و فەرماندە مەزڵووم عەبدی کردەوە.