تا ئێستا ڕێگاکانی شێخ مەقسود و ئەشرەفییە لە حەلەب نەکراونەتەوە

ئاڤا نیوز

بۆ چوارەم ڕۆژ لەسەر یەک، گەمارۆی سەر گەڕەکەکانی شێخ مەقسود و ئەشرەفییە لە شاری حەلەب بەردەوامە. هێزەکانی حکومەتی سووریا هەموو ڕێگاکانیان داخستووە، جگە لە دوو ڕێگا کە تەنیا ڕێگەی پیادەڕەویان پێ دەدرێت و ئۆتۆمبێل و ئامێرەکان ناتوانن تێیاندا بڕۆن.

چیرۆکی سەرەکی: ماوەی سێ ڕۆژە حەوت ڕێگاکەی گەڕەکەکانی شێخ مەقسود و ئەشرەفییە لەلایەن هێزەکانی سەر بە حکومەتی سووریا لە پارێزگای حەلەب داخراون، ئەمەش دوای هێرشی هێزەکانی سەر بە حکومەتی سووریا بۆ سەر ئەو دوو گەڕەکە کە بەهۆیەوە هاووڵاتییەک گیانی لەدەستدا و 60 کەسی دیکەش برینداربوون.

بڵاوکراوەی فەرمی: بەگوێرەی میدیای نزیک لە هێزەکانی سووریای دیموکرات، دوو ڕێگا کراوەکە بۆ پیادەڕەوان بریتین لە "عەوارید" و "دەوار شێحان"، بەڵام ڕێگاکانی دیکە (دەوار لێرمۆن، دەوار جەندول، ڕێگەی حەدیقە، تەڵعەی ئەشرەفییە و جەزیرە) بە تەواوی داخراون.

ئەوەی پێویستە بیزانیت: داخستنی ئەو ڕێگایانە بەگوێرەی ڕێککەوتنی نێوان ئەنجوومەنی گشتی گەڕەکەکانی شێخ مەقسود و ئەشرەفییە و نوێنەرانی حکومەتی لە حەلەبە کە لە 1ـی نیسان واژۆ کرابوو، نابێت ئەو ڕێگایانە دابخرێن. ئەو ڕێککەوتنە ئازادی هاتووچۆی دانیشتووانی گەڕەکەکانی مسۆگەر دەکرد و حەوت بازگەی هاوبەشیشی لەسەر ئەو ڕێگا سەرەکییانە دادەنا، بۆ ڕێکخستنی هاتووچۆ و دڵنیابوون لە جێبەجێکردنی بڕگەکانی ڕێککەوتنەکە.

داواکاری فەرمی: دانیشتووانی ئەو دوو گەڕەکە کوردنشینە لە حەلەب داوای هەڵگرتنی دەستبەجێی گەمارۆکە و کردنەوەی ڕێگاکان دەکەن، جەخت لەوە دەکەنەوە، بەردەوامبوونی داخستنی ئەو ڕێگایانە کێشەکانیان قووڵتر دەکاتەوە و ڕێگرە لە گەیشتنی پێداویستییە سەرەکییەکان و خزمەتگوزارییەکان بۆ گەڕەکەکانیان.

ئەوەی لەبارەیەوە دەگوترێت: ئەنجوومەنی گشتی گەڕەکەکانی شێخ مەقسود و ئەشرەفییە پشتڕاستی دەکاتەوە کە ئەوان بەردەوامن لە کارکردن لە ڕێگەی کەناڵەکانی پەیوەندییەوە لەگەڵ حکومەتی کاتی، بە ئامانجی کۆتاییهێنان بە گەمارۆی سەر هەردوو گەڕەکەکە.