نێچیرڤان بارزانی و ئەردۆغان لەسەر گرنگیی هەناردەكردنەوەی نەوت هاوڕابوون

ئاڤا نیوز

 

نێچیرڤان بارزانی و ئەردۆغان هاوڕابوون لەسەر ئەوەی دەستپێكردنەوەی هەناردەی نەوتی هەرێمی كوردستان، لە بەرژەوەندیی ئابووریی تەواوی عێراقدایە و، پرۆسەكە خزمەت بە ئارامی و سەقامگیریی عێراق بەگشتی دەكات.

 

چیرۆكی سەرەكی: ئێواره‌ى ئه‌مڕۆ پێنجشه‌ممه‌ 9-10-2025، نێچيرڤان بارزانى، سه‌رۆكى هه‌رێمى كوردستان، له‌ ئه‌نقه‌ره‌ له‌گه‌ڵ ڕه‌جه‌ب ته‌ييب ئه‌ردۆغان، سه‌رۆككۆمارى توركيا كۆبووه‌وه‌. پەیوەندییەكانی توركیا لەگەڵ عێراق و هەرێمی كوردستان، بوارەكانی هاریكاریی هاوبەشی توركیا و هەرێمی كوردستان، دۆخی گشتيى عێراق، پرۆسه‌ى سياسى و هه‌ڵبژاردنى ئه‌نجوومه‌نى نوێنه‌رانى عێراق، دۆخى ناوخۆى هه‌رێمى كوردستان و پێشهاته‌كانى سووريا، تەوەرە سەرەكییەكانی كۆبوونەوەكە بوون.

 

ڕاگەیێنراوی فەرمی: بەپێی ڕاگەیێنراوی سەرۆكایەتی هەرێمی كوردستان، هه‌ردوولا ستايشى ئاستى په‌يوه‌ندييه‌كانى توركيا و هه‌رێمى كوردستانيان كرد و ئاماده‌يييان نيشان دا بۆ بره‌وپێدانى زياتر به‌ هاريكاريى هاوبه‌ش له‌ هه‌موو بواره‌كاندا، به‌تايبه‌تى له‌ بوارى ئابوورى و ئاڵوگۆڕى بازرگانى و هاريكارى له‌ كه‌رتى وزه‌دا.

 

بابەتە ستراتیژییەكە: نێچیرڤان بارزانی و ئەردۆغان هاوڕابوون لەوەی؛ ده‌ستپێكردنه‌وه‌ى هه‌نارده‌كردنى نه‌وتى هه‌رێمى كوردستان بۆ بازاڕه‌كانى جيهان له‌ ڕێگه‌ى به‌نده‌رى جه‌يهانى توركييه‌وه، له‌ به‌رژه‌وه‌نديى ئابووريى ته‌واوى عێراقدايه‌‌ و، پرۆسه‌كه‌ خزمه‌ت به‌ ئارامى و سه‌قامگيريى عێراق به‌گشتى ده‌كات.

 

لەلایەكی دیكەوە: سەرۆككۆماری توركیا، به‌رده‌واميى پشتيوانى و پشتگيريى وڵاته‌كه‌ى بۆ عێراق و هه‌رێمى كوردستان دووپات كرده‌وه و په‌يوه‌ندييه‌كانى وڵاته‌كه‌ى له‌گه‌ڵ هه‌ردوولادا به‌ گرنگ و جێى بايه‌خى توركيا له‌ قه‌ڵه‌م دا.

 

لاى خۆيه‌وه‌: سەرۆكی هەرێمی كوردستان سوپاس و پێزانينى بۆ پشتیوانى و هاريكاريى توركيا له‌ عێراق و هه‌رێمى كوردستان ده‌ربڕى و دووپاتى كرده‌وه‌ كه‌ توركيا دراوسێيه‌كى گرنگى هه‌رێمى كوردستان و عێراقه‌ و ده‌توانن له‌ زۆر بواردا و بۆ به‌رژه‌وه‌نديى هاوبه‌ش، پێكه‌وه‌ هاريكارى بكه‌ن.

 

قوڵتر: پاراستنى ئارامى و سه‌قامگيريى ناوچه‌كه‌، هه‌نگاوه‌كانى پرۆسه‌ى ئاشتى له‌ توركيا، دوايين پێشهاته‌كانى ڕۆژهه‌ڵاتى ناوه‌ڕاست و چه‌ند پرسێكى ديكه‌ى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه‌ بوو.

 

ئەمەش بزانە: دوای وەستانی هەناردەكردنی نەوتی هەرێمی كوردستان بۆ ماوەی زیاتر لە 30 مانگ، ڕۆژی 27ـی ئەیلوولی 2025، هەناردەكردنەوەی نەوت لەڕێگەی بۆریی بۆ بازاڕەكانی جیهان لەڕێگای بەندەری جەیهانی توركییەوە، دەستیپێكردەوە.