لەسەر ڕووداوەكەی نەخۆشخانەی شار سێ تۆمەتبار دەستگیر دەكرێن

ئاڤا نیوز

سێ‌ تۆمەتبار لەسەر ڕووداوەكەی شەوی ڕابردووی نەخۆشخانەی شار لە سلێمانی دەستگیر دەكرێن، كە لەژێر كاریگەری خواردنەوەی مەی، چەكی پاسەوانێك دەڕفێنن و تەقە لە پۆلیسەكان دەكەن.

چیرۆكی سەرەكی: شەوی ڕابردوو لەكاتژمێر 12:00ـی دوای نیوەشەو، سێ كەس بەمەبەستی سەردانیكردنی نەخۆش، دەچنە نەخۆشخانەی شار لە سلێمانی، لەلایەن كارمەندانی پاسەوانی پرسگەی نەخۆشخانەكە ڕێكاری گونجاو دەگیرێتەبەر و ڕێگرییان لێ دەكرێت بچنە ژوورەوە؛ بەو پێیەی یەكێكیان بە ناڕاستی خۆی بە پزیشكی نەخۆشخانەكە ناساندووە و،  یەكێكی دیكەیان مەست بووە و لەژێر كاریگەریی خواردنەوە كحولییەكان بووە، بەهۆیەوە گرژی و ئاڵۆزی دروستبووە.

ڕاگەیێنراوی فەرمی: بەپێی ڕاگەیێنراوی بەڕێوەبەرایەتیی پۆلیسی سلێمانی، دوای ئەوەی پۆلیسەكان بەپێی ڕێنمایی ڕێگەیان نەداوە ئەو سێ كەسە بچنە نێو نەخۆشخانەی شار، شەڕ و ئاڵۆزی دروستبووە و یەكێك لە تۆمەتبارەكان، چەكی پۆلیسێك دەڕفێنێت و تەقە دەكات و هەڵدێت. دوای ئەو ڕووداوە؛ مەفرەزەكانی بەشی پۆلیسی فریاكەوتن و بنكەی پۆلیسی نەخۆشخانەكە، ئەو سێ تۆمەتبارە دەستگیر دەكەن.

زانیاریی زیاتر: ئێستا هەریەک لە تۆمەتباران (س ، س) لەدایكبووی 1969 (ب ، س ، س) لە دایكبووی 2006 (ب، س، س) لەدایكبووی 2004 بە بڕیاری دادوەر و بە پێی ماددەی 31/405 لە یاسای سزاكانی عێراقی ڕاگیراون و لێکۆڵینەوە لەگەڵیان بەردەوامە، كە بڕگەیەكی ئەم ماددەیە پەیوەستە بە هەوڵدان بۆ ئەنجامدانی تاوانی كوشتن.