ئەمەریکا بە بەهای 130 ملیۆن دۆلار هاوکاری هەسەدە دەکات

ئاڤا نیوز

ڕەشنووسی بودجەی ساڵی دارایی 2026ـی وەزارەتی جەنگی ئەمەریکا لە ئەنجوومەنی پیران تێپەڕێندرا و بەپێی ڕەشنووسەکە، بودجەی ئەو وەزارەتە نزیکەی 925 ملیار دۆلار دەبێت و 130 ملیۆن دۆلاری بۆ هەسەدە تەرخان دەکرێت.

چیرۆکی سەرەکی؛ ئەنجوومەنی پیرانی ئەمەریکا بە 77 دەنگی بەڵێ، لە بەرامبەر 20 دەنگی نەخێردا ڕەزامەندی نیشان دا لەسەر پڕۆژەیاسای "دەسەڵاتپێدانی بەرگریی نیشتمانیی 2026" کە مانگی ڕابردوو لە ئەنجوومەنی نوێنەران پەسەند کرا.

 

ئەوەی پێویستە بیزانیت؛ وەزارەتی جەنگی ئەمەریکا داوای کردووە بۆ پشتیوانیکردنی ئەمەریکا لە بەرەنگاربوونەوەی تیرۆر لە ناوچەکە؛ 130 ملیۆن دۆلار تەرخان بکرێت بۆ هەسەدە و سوپای سووریای ئازاد کە لە باشووی سووریا جێگیر کراوە.

 

شێوازی جێبەجێ کردن؛ لە ڕەشنووسی پڕۆژەیاساکەدا سەرنج خراوەتە سەر ئەوەی تەرخانکردنی ئەم پارەیە بۆ هەسەدە و سوپای سووریای ئازاد؛ بۆ مەشق و ڕاهێنان، دابینکردنی پێداویستیی سەربازی و پێدانی مووچەیە.