هێرشی ئیسرائیل بۆ سەر لوبنان کوژراوی لێدەکەوێتەوە

ئاڤا نیوز
 

فڕۆکە جەنگییەکانی ئیسرائیل هێرشیان کردە سەر باشووری لوبنان و ژمارەیەک بولدۆزەر و حەفارەیان بۆردوومان کرد.

 

ڕاگەیێنراوی فەرمی؛ سوپای ئیسرائیل پشتڕاستی کردەوە کە هێرشەکانی لە لوبنان ئەنجامداوە و لە بەیاننامەیەکدا ئاماژەی بەوەکردووە ژێرخانی حیزبوڵڵای لە ناوچەی باشووری لوبنان کردووەتە ئامانج و ئەو ئامێرانە بۆ ئەوە بوون تا خۆی پێ بونیاد بنێتەوە. 

 

زیانەکان؛ وەزارەتى تەندروستىی لوبنان ڕایگەیاند بەهۆی هێرشەکەی ئیسرائیلەوە کەسێک کوژراوە و حەوت کەسى دیکەش برینداربوون.

 

ئەمەش بزانە؛ سەرەڕای ئاگربەستی مانگی نۆڤەمبەر، ئیسرائیل چەندین جار لوبنانی بۆردوومان کردووە و ئاگربەستەکەی پێشێل کردووە.

 

ئەوەی لەبارەیەوە دەگوترێت؛ جۆزێف عەون، سەرۆکی لوبنان، ئیدانەی ئیسرائیلی کرد  و وتی هێرشەکە بۆ سەر دامەزراوە مەدەنییەکان بووە و هیچ پاساو و بیانوویەک هەڵناگرێت.