کێشەی کەمئاوی لە ئاکرێ و بەردەڕەش و خەبات کۆتایی دێت

ئاڤا نیوز

حکومەتی هەرێمی کوردستان لەماوەی یەک ساڵدا کێشەی کەمئاوی لە سێ ناوچەی فراواندا چارەسەر دەکات و تا 30 ساڵی دیکە کەمئاوی بەرۆکیان ناگرێت.

وێنە گەورەکە: حکومەتی هەرێمی کوردستان پلاندادەنێت بۆ ئەوەی ساڵی داهاتوو، 70%ـی ئاو لەڕێگەی ئاوی ڕووبار و زێیەکان دابین بکات، 30% پشت بە ئاوی ژێر زەوی و بیرەکان ببەسرێت و سامانی ئاوی ژێر زەوی پارێزگاری لێبکات.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی کوردستان بە ئاڤای گوت، لە پڕۆژەی ئاوی بەردەڕەش، سێ ناحیە و 70 گوند سوودمەند دەبن، بە گوژمەی 428 ملیار دینار جێبەجێ دەکرێت، پڕۆژەکە لە یەک کاتژمێردا سێ هەزار مەتر سێجا ئاو گلدەداتەوە، 360 کیلۆمەتر تۆڕی ئاو و گواستنەوەیە، 58 خەزان لەخۆدەگرێت، لەماوەی 15 ڕۆژی داهاتوو بەردی بناغەی دادەنرێت.

لەلایەکی دیکەوە:  پڕۆژەی ئاوی خەبات، 195 ملیار دینار ڕەزامەندی خەرجکردنی هەیە، لەئایندەیەکی نزیک دەدرێت بە کۆمپانیاکان. سەبارەت بە پڕۆژەی ئاوی ئاکرێ, بەڕێوەبەری گشتیی ئاو و ئاوەڕۆی کوردستان ئاماژەی بەوەکرد کە 60٪ـی پڕۆژەکە تەواوبووە، سێ هەزار مەتر سێجا لە کاتژمێرێک ئاو گلدەداتەوە، 120 کیلۆمەتر هێڵ گواستنەوە و  دابەشکردنە، سێ خەزانی سەرەکی لەخۆ دەگرێت، سێ ناحیە و ژمارەیەک گوندی سنوورەکە لێی سوودمەند دەبن، تاوەکو کۆتایی 2026 کۆتایی بە کێشەی کەمئاوی ئەو سنوورە دێت.