دابەشکردنی نەوتی سپی لە ناوچە شاخاوییەکان دەستیپێکرد

ئاڤا نیوز

وەزارەتی سامانە سرووشتییەکان بڕی نەوتی پێویستی بۆ پارێزگا و ئیدارە سەربەخۆکان ئامادەکردووە و بەشێکی نێردراوە، ئەمڕۆ دەست بە دابەشکردنی دەکرێت و لە سۆران هاووڵاتیان وەریدەگرن.

وێنە گەورەکە: بۆ سێیەم ساڵ لەسەر یەک حکومەتی هەرێمی کوردستان پێش هاتنی وەرزی سەرما، نەوتی سپی بەنرخی پاڵپشتیکراو لە ناوچە شاخاوییەکان دابەش دەکات، هەر خێزانێک 200 لیتری پێدەدرێت.

زانیاریی تایبەت: سەرچاوەیەک لە وەزارەتی سامانە سرووشتییەکان بە ئاڤای گوت، بڕی پێویست لە خەزانەکان هەیە و قۆناغ بە قۆناغ بۆ سنووری ناوچە شاخاوییەکان دەنێردرێت، لەم هەفتەیە لە سەرجەم ناوچە شاخاوییەکانی هەرێمی کوردستان نەوتی سپی دابەش دەکرێت.

لێدوانی فەرمی: ئەمیر سەلیم، بەڕێوەبەری نەوت و کانزاکانی سۆران بە ئاڤای ڕاگەیاند، ئەمڕۆ لە وەرتێ، چۆمان و حاجی ئۆمەران پرۆسەکە دەستپێدەکات و ڕۆژانە هاووڵاتیانی سنووری ناوچە شاخاوییەکان نەوت وەردەگرن و لەچەند ڕۆژێکدا سەرجەمیان نەوتیان پێدەدرێت.

لەلایەکی دیکەوە: کارزان ڕەئوف، بەڕێوەبەری نەوت و کانزاکانی دهۆک بۆ ئاڤا گوتی، نەوت گەیشتووەتەی دهۆک و لەم هەفتەیە دەست بە دابەشکردنی دەکەین.