حکومەتی عێراق بڕیاری دا سێ ملیۆن لیتر نەوتی سپی بۆ کوردستان بنێرێت

ئاڤا نیوز

ئەنجوومەنی وەزیرانی عێراق بڕیاریدا بڕی سێ ملیۆن لیتر نەوتی سپی بە نرخێکی گونجاو بداتە خەڵکی کەمدەرامەتی شارەکانی هەرێمی کوردستان.

زانیاریی بەدەستهاتوو: سەرچاوەیەک لە ئەنجوومەنی وەزیرانی عێراق تایبەت بە ئاڤا میدیای ڕاگەیاند، لە کۆبوونەوەی ئەمڕۆی ئەنجوومەنی وەزیرانی عێراقدا، بڕیاردرا بڕی 3 ملیۆن لیتر نەوتی سپی بە نرخێکی گونجاو بدرێتە خەڵکی کەمدەرامەتی شارەکانی هەرێمی کوردستان.

زانیاریی زیاتر: بە گوتەی ئەو سەچاوەیە، پارێزگاکانی هەولێر، دهۆک هەریەکەو بڕی ملیۆنێک لیتر نەوتی سپیان پێدەدرێت، لە بەرامبەر هەر بەرمیلێکیش بڕی 30 هەزار دینار وەردەگیرێت.

ئەوەی پێویستە بیزانیت: کەمال محەممەد، وەزیری سامانە سرووشتییەکانی حکومەتی هەرێمی کوردستان پێشتر بە ئاڤا میدیای ڕاگەیاندبوو، وەزارەتی نەوتی عێراق ساڵانە بڕی 50 ملیۆن لیتر نەوت بۆ هەرێمی کوردستان دەنێرێت، ئەمەش ناگاتە 20% پێداویستیی هەرێمی کوردستان، "چونکە پێداویستی ئێمە 267 ملیۆن لیترە، بۆیە ناچارین ئەو بڕەیە تەنیا بەسەر ناوچە شاخاوییەکان دابەش بکەین".

ئەمەش بزانە: ئەو سێ ملیۆن لیترەی نەوتەی عێراق بڕیاریداوە بینێرێت، بە گشتی 15 هەزار خێزان لێی سوودمەند دەبن ئەگەر بێت و هەر خێزانێت بڕی 200 لیتری پێبدرێت، پێنج هەزار خێزان لە هەولێر، پێنج هەزار خێزان لە دهۆک و پێنج هەزار خێزان لە سلێمانی.