چوارچێوەی هەماهەنگی: دەستووری عێراق لە جێبەجێکردندا ڕووبەڕووی ئاڵنگاری گەورە بووەتەوە

ئاڤا نیوز

چوارچێوەی هەماهەنگی ڕایدەگەیێنێت، دەستووری عێراق، سەرەڕای ئەوەی بنەمای یەکێتی و سەقامگیری وڵاتە، لە جێبەجێکردنیدا ڕووبەڕووی ئاڵنگاری گەورە بووەتەوە. ئەوان داوای چاکسازی جیددی دەکەن بۆ ئەوەی متمانەی نێوان هاووڵاتی و دەوڵەت بگەڕێتەوە.

 

چیرۆکی سەرەکی: چوارچێوەی هەماهەنگی، بەبۆنەی یادی سەد ساڵەی یەکەم دەستووری عێراق و بیست ساڵەی دەستووری هەمیشەیی ساڵی 2005، ڕاگەیێنراوێکی بڵاوکردەوە، چوارچێوەکە بەم بۆنەیەوە  پابەندبوونی قووڵی خۆی بە سیستمی دەستووری دیموکراتی دووپات دەکاتەوە وەک گەرەنتییەک بۆ یەکێتی و سەقامگیری دەوڵەت.

 

ڕاگەیێنراوی فەرمی: لە ڕاگەیەندراوەکەی چوارچێوەی هەماهەنگیدا هاتووە: "ئەزموونی دەستووری عێراق لە جێبەجێکردن و پراکتیزەکردندا ڕووبەڕووی ئاڵنگاریی گەورە بووەتەوە" ئەمەش نیشانەی ئەوەیە کە پێویستە چاکسازی جیددی لە سیاسەت و دامودەزگاکاندا بکرێت، بۆ ئەوەی دادپەروەری زیاتر بێت و هاووڵاتیبوون بەهێز بکرێت، متمانەی نێوان هاووڵاتی و دەوڵەتیش بگەڕێتەوە.

 

چوارچێوەی هەماهەنگی لە کۆتاییدا جەخت لەوە دەکاتەوە، بە لەبەرچاوگرتنی هەڵبژاردنەکانی داهاتوو، "هەڵبژاردنی ئازاد و بێگەرد باشترین ڕێگایە بۆ ئەوەی دەسەڵات بە ئاشتییانە بگوازرێتەوە و متمانەی خەڵک نوێ بکرێتەوە." ئەوان پێیان وایە، پەرەپێدانی بەردەوامی ئەزموونی دەستووری، ئەرکێکی نیشتمانییە بۆ بونیادنانی دەوڵەتێکی دادپەروەر و بەهێز کە خواست و ئاواتەکانی هەموو عێراقییەکان جێبەجێ بکات.

 

ئەوەی پێویستە بیزانیت: ئەو دانپێدانانەی چوارچێوەی هەماهەنگی، بەوەی کە "دەستوور لە جێبەجێکردنیدا ڕووبەڕووی ئاڵنگاری گەورە بووەتەوە" لە کاتێکدایە کە دوو ڕۆژ لەمەوبەر سەرۆک بارزانی، لە بانگەشەی حیزبەکەی لە هەولێر دووپاتیکردەوە کە کەس هێندەی کورد بۆ نووسینەوەی دەستوور ماندوو نەبووە و دەستوورەکەشی بە "زۆر باش" ناوبرد کە تا ڕادەیەکی زۆر مافەکانی کورد دەستەبەر دەکات. بەڵام نیگەرانی خۆی دەربڕی لەوەی کە "بەداخەوە پێیەوە پابەند نەبوون"، و ئەمەش بووەتە هۆی زۆربەی کێشەکانی نێوان هەرێم و بەغدا.