زانکۆی دهۆک سەنتەرێکی تایبەت بە چارەسەری ئاڵوودەبووانی ماددەی هۆشبەر دەکاتەوە

ئاڤا نیوز

لە هەنگاوێکی نوێدا زانکۆی دهۆک سەنتەرێکی تایبەت بە چارەسەری ئاڵوودەبووانی ماددەی هۆشبەر دادەمەزرێنێت. ئاڵوودەبووان لەو سەنتەرە بە چەند قۆناغێک چارەسەریان بۆ دادەنرێت و ڕۆژانە چارەسەر وەردەگرن و دەگەڕێنەوە ماڵەوە.

 

وێنە گەورەکە: ساڵانە هەزاران گەنج و تازەپێگەیشتوو لە هەرێمی کوردستان ڕووبەڕووی مەترسیی بەکارهێنانی ماددە هۆشبەرەکان دەبنەوە؛ حکومەتی هەرێمی کوردستان چەند ڕێگایەکی گرتووەتەبەر بۆ ئەوەی ڕێگری لە بڵاوبوونەوەی لە نێو کۆمەڵگەدا بکات.

 

لێدوانی فەرمی: د. دڵشاد حەکیم، یاریدەدەری سەرۆکی زانکۆی دهۆک بە ئاڤای گوت، "وەک زانکۆی دهۆک سەنتەرێکمان بۆ چارەسەری ئاڵوودەبووانی ماددەی هۆشبەر کردووەتەوە، بەشێکی دیکەی ئەو ناوەندە پەیوەستە بە ڕاهێنانی چینێک بەو ئامانجەی هۆشیاری لە نێو تاکەکاندا بڵاوبکەنەوە."

 

زانیاریی زیاتر: د. بەهار سلێمان، یاریدەدەری ڕاگری پەیمانگەی چارەسەری دەروونی بە ئاڤای ڕاگەیاند، "ئەو پڕۆژەیە هاوبەشە لەنێوان زانکۆی دهۆک و زانکۆی بادنلوتنبێرگ لە ئەڵمانیا، ئەو سەنتەرە پزیشکی دەروونی و لێکۆڵەرەوەی جڤاکی لێیە، ئاڵوودەبووان لەو سەنتەرە بە چەند قۆناغێک چارەسەریان بۆ دادەنرێت و ڕۆژانە چارەسەر وەردەگرن و دەگەڕێنەوە ماڵەوە."