بەرهەمی ڕۆژانەی غاز لە کێڵگەی کۆرمۆر بەرزدەکرێتەوە بۆ 750 ملیۆن پێ سێجا

ئاڤا نیوز

 

دانەغاز بەهاوبەشی کۆمپانیای کریسنت پترۆليۆم دوای ماوەیەک کارکردن توانیان بەرهەمی غازی کێڵگەی کۆرمۆر زیاد بکەن، ئێستا توانای بەرهەمهێنان لەو کێڵگەیە بەڕێژەی زیاتر لە 50% بەرزبووەتەوە.

 

بۆچی گرنگە؛ پێشتوور بەرهەمی ڕۆژانەی بەرهەمهێنانی غاز لە هەرێمی کوردستان نیو ملیار پێ سێجا بوو کە 75%ـی کارەبای هەرێمی کوردستانی پێ دابین دەکرا، حکومەتی هەرێمی کوردستانیش بڕیاریداوە تا ساڵی 2026 و لە ڕێگەی پڕۆژەی ڕووناکییەوە، کارەبای نیشتمانیی بەشێوەی 24 کاتژمێر بۆ هاووڵاتیان دابین بکات کە خواست و داواکارییەکی هەرە گرنگی خەڵک بووە لە دوای ڕاپەڕینەوە، بە زیادبوونی ڕێژەی بەرهەمهێنانی غاز لە کۆرمۆر کاریگەری ئەرێنی لەسەر کارەبای هەرێمی کوردستان دەبێت.

 

بڵاوکراوەی فەرمی: بەگوێرەی بڵاوکراوەی فەرمی کۆمپانیای دانا غاز، پڕۆژەی زیادکردنی توانای بەرهەمهێنانی غاز لە کۆرمۆر هەشت مانگ پێش وادەی خۆی تەواوبوو، ئێستا بەرهەمی ڕۆژانە 250 ملیۆن پێ سێجا زیادکراوە، بەمەش بەرهەمی ڕۆژانە دەگاتە 750 ملیۆن مەتر سێجا، توانای بەرهەمهێنان بەڕێژەی زیاتر لە 50% زیاد دەکات.

 

ئەمەش بزانە: تێچووی گشتیی پڕۆژەکە یەک ملیار و 100 ملیۆن دۆلار بووە و، 6 هەزار تۆن ئاسنی تێدا بەکارهاتووە و کرێکارەکان 6.2 ملیۆن کاتژمێر کاریان کردووە.