خەڵکی گوندێکی هەورامان بەهۆی 'بەڵێنێک' نە خزمەتی سەربازی دەکەن نە پاسپۆرتیان هەیە

ئاڤا نیوز

چیرۆکی گوندی هەجیج لە هەورامان و بەخشینی خەڵکەکەی لە خزمەتی سەربازی و پێویستیی پاسپۆرت، چیرۆکێکی مێژوویی سەرنجڕاکێشە کە پەیوەستە بە بەڵێنێکەوە کە لە نێوان ڕەزا شای پەهلەوی، شای پێشووی ئێران و شێخ عوسمانی سیراجەدین، ڕێبەری تەریقەتی نەقشبەندی، دراوە.

 

چیرۆکی سەرەکی؛ لە بیستەکانی سەدەی ڕابردوودا، کاتێک ڕەزا شا هێشتا سەربازێکی سادە بوو، ڕێکەوت  چاوی بە شێخ عوسمانی سیراجەدین دەکەوێت. لەو دیدارەدا، شێخ عوسمان پێشبینییەکی سەیر بۆ ڕەزا شا دەکات و پێی دەڵێت: "تۆ دەبیت بە شای ئێران". ڕەزا شا بە سەرسوڕمانەوە وەڵامی دەداتەوە و دەپرسێت: "من؟". پاشان بەڵێن بە شێخ دەدات و دەڵێت: "ئەگەر شتێکی وا ڕووبدات، چ داواکارییەکت هەیە بۆتی جێبەجێ بکەم؟" شێخ عوسمانیش لە وەڵامدا تەنها یەک داواکاریی هەبوو: "خەڵکی هەجیج لە خزمەتی سەربازی ببەخشە".

 

دواتر چی ڕووی دا؟ ساڵان تێپەڕین و پێشبینییەکەی شێخ عوسمان هاتە دی و ڕەزا شا بوو بە شای ئێران. وەک وەفایەک بۆ بەڵێنەکەی، فەرمانێکی شاهانەی دەرکرد و خەڵکی گوندی هەجیجی لە خزمەتی سەربازی بەخشی. ئەم بڕیارە مێژووییە وای کرد کە لەو کاتەوە تا ئێستا، تەنها یەک پیاو لەو گوندە بە ناوی "محەممەد عەزیز" خزمەتی سەربازی کردبێت.

 

کاتێک پاشای ئەوکاتی عێراق گوێبیستی ئەم چیرۆکە دەبێت، ئەویش سەرسام دەبێت و بڕیارێکی هاوشێوە دەردەکات. بەپێی بڕیارەکەی مەلیکی عێراق، خەڵکی هەجیج نەک هەر لە خزمەتی سەربازی لە عێراقیش بەخشران، بەڵکو پێویستییان بە پاسپۆرتیش نەما بۆ هاتووچۆکردن لە نێوان سنوورەکانی عێراق و ئێراندا. ئەم تایبەتمەندییە وایکردووە کە دانیشتووانی گوندی هەجیج بە ئارەزووی خۆیان و بەبێ هیچ بەربەستێکی یاسایی، لە نێوان هەردوو وڵاتدا هاتووچۆ بکەن.