هەسەدە لەناوبردنی چەند شانەیەکی داعش بە هاوکاریی هاوپەیمانان ڕادەگەیێنێت

ئاڤا نیوز

هێزەکانی سووریای دیموکرات (هەسەدە) ڕایگەیاند، بەهاوکاری هاوپەیمانی نێودەوڵەتی لە دەوروبەری بەشی ڕۆژهەڵاتی دێرەزووری ڕۆژهەڵاتی سووریا، دوو ئۆپەراسیۆنی ئەمنییان ئەنجامداوە و بەهۆیەوە چەند شانەیەکی داعش لەناوبراون.

چیرۆکی سەرەکی: مانگی ڕابردوو هەسەدە هۆشدارییدا کە داعش تا ئێستاش هەڕەشەیەکی ڕاستەقینەیە لەناوخۆی سووریا و لە ئاستی نێودەوڵەتی، بەتایبەتیش کە ئاماژەکان دەری دەخەن ڕێکخراوەکە تا ئێستاش توانای ئەنجامدانی هێرشی ماوە کە بەهۆیەوە دەتوانێت زیان بە خەڵکی مەدەنی و ئاسایشی ناوچەکە بگەیێنێت.

ڕاگەیێنراوی فەرمی: هێزەکانی سووریای دیموکرات (هەسەدە) ئەمڕۆ پێنجشەممە لە ڕاگەیێنراوێکدا ئاماژەی بەوەكردووە، لە گوندی بریهە و سەبحەی ناوچەی ئەلبەسیرە لە ڕۆژهەڵاتی دێرەزوور، دوو ئۆپەراسیۆنی ئەمنییان ئەنجامداوە و بەهۆیەوە سێ کەس دەستگیرکراون و دەستیش بەسەر ژمارەیەک چەک و کەرەستەی سەربازیدا گیراوە، کە لە هێرشکردنەسەر هێزەکانی هەسەدە و خەڵکی مەدەنیدا بەکاردەهێنران.

ئەوەشی خستووەتەڕوو، ئەو کەسانەی دەستگیرکراون بەشێک بوون لە شانە نوستووەکانی داعش و لە ئەنجامدانی چەندین هێرش بۆ سەر ناوچەکانی دێرەزوو بەشداربوون و ڕۆڵیان هەبووە.