زیانلێکەوتووانی بانگەشەی هەڵبژاردن داوای قەرەبووکردنەوە دەکەن

ئاڤا نیوز

زیانلێکەوتووانی بانگەشەی هەڵبژاردن لە بەسرە داوای قەرەبووکردنەوە دەکەن و ڕەخنە لە کەمتەرخەمی لایەنە فەرمییەکان دەگرن، لە بەرامبەردا کۆمیسیۆنی هەڵبژاردنەکان جەخت دەکاتەوە کە ئەم حاڵەتانە دەکەونە چوارچێوەی دەسەڵاتی دادگاکانی شارستانی و ئەوان بەرپرسیار نین لە قەرەبووکردنەوە.

وێنە گەورەکە: لەگەڵ دەستپێکی بانگەشەی هەڵبژاردن و هەڵواسین و دانانی وێنە کاندیدەکان لەسەر شۆستەکان و ڕێگا سەرەکی و شوێنە گشتییەکان، ژمارەیەکی زۆر لە تابلۆیانە بەسەر ئۆتۆمبێل و موڵکی تایبەتدا کەوتوونەتە خوارەوە، کە زیانێکی ماددیی بەرچاوی لێکەوتووەتەوە و ناڕەزایەتی هاووڵاتیانی لێ کەوتووەتەوە.

لێدوانە فەرمییەکان: حەیدەر تەحسین، یەکێک لە زیانلێکەوتووانی بانگەشەی هەڵبژاردن لە پارێزگای بەسرە بە ئاڤا میدیای ڕاگەیاند، دوای کەوتنەخوارەوەی تابلۆی کاندیدێک بەسەر ئۆتۆمبێلەکەمدا و زیانگەیاندن پێی، سکاڵام تۆمار کردووە، بەڵام هیچ وەڵامێکم وەرنەگرتووە و ناچار بووم لەسەر گیرفانی خۆم ئۆتۆمبێلەکەم چاک بکەمەوە. هاووڵاتییەکی دیکەش بەناوی عەدنان عەلی هەر لە بەسرە جەختی لەوە کردەوە کە ئەم ڕووداوانە بەرپرسیارێتی کۆمیسیۆنی هەڵبژاردنیشن لە چاودێرکردنی شوێنی دانانی تابلۆکان.

بۆچوونی لایەنی بەرامبەر: حەیدەر سەیلاوی، بەڕێوەبەری نووسینگەی کۆمیسیۆنی هەڵبژاردنەکان لە بەسرە، بە ئاڤا میدیای ڕایگەیاند، کۆمیسیۆن بە شێوەیەکی ڕاستەوخۆ بەرپرسیار نییە لە تاوتوێکردنی زیانەکانی هەڵمەتە هەڵبژاردنەکان، بەڵکو ئەم جۆرە حاڵەتانە دەکەونە چوارچێوەی دەسەڵاتی دادگاکانی شارستانی. ناوبراو ڕوونیشی کردەوە کە هاووڵاتیانی زیانلێکەوتوو دەبێت سەرەتا زیانەکانیان بەڵگەدار بکەن و پاشان سکاڵای فەرمی پێشکەش بە دادگا بکەن بۆ بڕیاردان لەسەر قەرەبووکردنەوە.

لەهەمان کاتدا: سەیلاوی دووپاتی کردەوە کە نووسینگەی کۆمیسیۆن هەر سکاڵایەک لەبارەی ڕەفتاری کاندیدەکانەوە وەرگرێت و ئاڕاستەی لایەنە دادوەرییەکان دەکات.

ئەوەی پێویستە بیزانیت: بانگەشەی هەڵبژاردنی پەرلەمانی عێراق، ڕۆژی 3ی تشرینی یەکەم، دەستیپێکرد و تا 8ی مانگی داهاتوو بەردەوام دەبێت. لەگەڵ دەستپێکردنی بانگەشەی هەڵبژاردنیش، سەنتەری ستراتیژی بۆ مافەکانی مرۆڤ لە عێراق ئاماژە بەوەکردبوو زیاتر لە ملیۆنێک وێنە هەڵواسراون.

باکگراوند: بڕیارە 2025-11-11، هەڵبژاردنی خولی شەشەمی پەرلەمانی عێراق بەڕێوەبچێت و بانگەشەی حیزب و لیست و هاوپەیمانیێتییەکانیش بەردەوامە.