لەگەڵ دەستپێکی بانگەشەی هەڵبژاردن زیاتر لە ملیۆنێک وێنە هەڵواسران

ئاڤا نیوز

سەنتەری ستراتیژی بۆ مافەکانی مرۆڤ لە عێراق ڕایدەگەیێنیت، ژمارەی وێنە هەڵواسراوەکانی کاندیدان لە سەرجەم پارێزگاکانی عێراقدا گەیشتووەتە زیاتر لە یەک ملیۆن وێنە.

ئەوەی پێویستە بیزانیت: بانگەشەی هەڵبژاردنی پەرلەمانی عێراق، کە بڕیارە لە 11ی تشرینی دووەم ئەنجام بدرێت، دوێنێ هەینی کە دەکاتە 3ی تشرینی یەکەم، دەستیپێکرد و تا 8ی مانگی داهاتوو بەردەوام دەبێت.

لێدوانی فەرمی: حازم ئەلرەدینی، جێگری سەرۆکی سەنتەرەکە لە لێدوانێکدا بە ئاڤا میدیای ڕاگەیاند، "ژمارەی ئەو وێنانەی لەسەر شەقامەکان دانراون، گەیشتووەتە زیاتر لە یەک ملیۆن وێنە"، ڕوونیشی کردەوە کە زۆربەی ئەم وێنانە لە بەشی ڕەسافەی پایتەختی بەغدان، هەندێکی دیکەشیان بە هۆکاری نادیار تێکدراون.

لەلایەکی دیکەوە: بەگوتەی ئەلرەدینی سەنتەرەکەیان لە یەکەم ڕۆژی دەستپێکردنی بانگەشەی هەڵبژاردن چاودێری چەندین پێشێلکارییان کردووە، وەک هەڵواسینی وێنەکان لەسەر دوورگەکانی ناوەڕاستی شەقامەکان و هەندێکی دیکەیان لەسەر باڵەخانە حکومییەکان، داواشی لە کۆمیسیۆنی باڵای سەربەخۆی هەڵبژاردنەکان کرد ڕێوشوێنی تووند لە دژی سەرپێچیکاران بگرێتەبەر.

ئەوەی پێشبینی دەکرێت: جێگری سەرۆکی سەنتەری ستراتیژی بۆ مافەکانی مرۆڤ لە عێراق پێشبینی کرد ژمارەی وێنەکان تا کۆتایی ڕۆژی بانگەشەی هەڵبژاردن لە 8ی تشرینی دووەمی داهاتوو، زۆر زیاتر ببێت.