چەند پەیامێک لە سەرۆک بارزانییەوە لەبارەی هەڵبژاردن و پێکهێنانی حکومەت

ئاڤا نیوز

لە کۆبوونەوەیەکدا لەگەڵ مامۆستایانی ئایینی موسڵمان و ژمارەیەک لە پیاوانی ئایینییەکانی دیکەی کوردستان، سەرۆک مەسعود بارزانی چەند پەیامێکی گرنگی ئاراستە کرد، کە تیشکی خستە سەر پێکهێنانی حکومەتی هەرێم، هەڵبژاردنەکانی داهاتوو، پرسی مووچە و گرنگیی پێکەوەژیان و یەکڕیزی.

پەیامی فەرمی: سەرۆک بارزانی ئاماژەی بەوەدا کە ئومێدەوارە حکومەتی کوردستان پێش هەڵبژاردنی پەرلەمانی عێراق پێکبێت و کاری جیدیش بۆ ئەم مەبەستە دەکرێت.

سەبارەت بە هەڵبژاردنەکان، سەرۆک بارزانی جەختی کردەوە کە "هەموو کەسێک ئازادە لە دەنگدان"، بەڵام گرنگە "ڕەچاوی ئەو خزمەتە بکرێت کە پێشکەشی شارەکانی کوردستان کراوە، وێڕای ئارامی و دابینکردنی ئەمنییەت بەبێ جیاوازی." هەروەها وتیشی، "کوردستان هەموو هەوڵێک دەدات بۆ ئەوەی لە داهاتوو لەگەڵ ئەوانە بێت کە ئاشنان بە مافەکانی خەڵکی کوردستان و جێبەجێشی دەکەن."

لەلایەکی دیکەوە: بارزانی لەبارەی پرسی مووچەوە ڕایگەیاند: "پڕ بە دڵ سوپاسی خەڵکی کوردستان دەکەم کە خۆڕاگربوون بەرامبەر زوڵمی بڕینی ژیان بژێوی خەڵکی کوردستان." وتیشی: "سەرەڕای هەموو تێبینییەک، بەڵام بۆ بەرژەوەندیی کوردستان بەشداری هەڵبژاردنمان کردووە."

لە هەمان کاتدا: سەرۆک بارزانی ستایشی فەرهەنگی پێکەوەژیانی لە کوردستان کرد و وتی: "فەرهەنگی پێکەوەژیانمان لە باب و باپیرانمانەوە بۆ ماوەتەوە، ئێمە هەموومان مرۆڤین و بەندەی خواین، بینینی ئێوە بەیەکەوە جوانترین نموونەی ڕەنگینی نیشانی جیهان داوە، ئەم فەرهەنگە زۆر خزمەتی کوردستان و مێژووەکەشی کردووە."

هەروەها، ئاماژەی بەوەدا کە تیرۆر لە کاتی خۆیدا "جیاوازی لە نێوان ئاینەکان نەکرد، بۆیە نابێ جیاوازی لەنێوان خۆماندا بکەین، ئومێدەوارین ئەم فەرهەنگە بەردەوام بێ و زیاتر بچەسپێت."

لە کۆتایی پەیامەکەیدا، سەرۆک بارزانی جەختی لە گرنگیی یەکڕیزی کردەوە و ڕایگەیاند: "پیلانی زۆر دژی هەرێمی کوردستان دەکرێت، بەدرێژایی مێژوو ئەمە سیاسەتی دەسەڵاتەکانی عێراق بووە، بۆیە تەنیا بە یەکبوون و پێکەوەیی دەتوانین بەرانبەر هەموو ئاڵنگارییەک بووەستینەوە."