زانکۆلاین بۆ دەرچووانی ناوچە کوردستانییەکانی دەرەوەی ئیدارەی هەرێمی کوردستان کارا دەکرێت

ئاڤا نیوز

وەزارەتی خوێندنی باڵا و توێژینەوەی زانستی ئامادەکاری دەکات بۆ ئەوەی دەرچووانی ناوچە کوردستانییەکانی دەرەوەی ئیدارەی هەرێم لە زانکۆ حکومییەکانی هەرێمی کوردستان جێگە بکاتەوە، بڕیارە بەم نزیکانە زانکۆلاین کارا بکات.

چیرۆکی سەرەکی: چوار ڕۆژ پێش ئێستا لە کۆنگرەیەکی ڕۆژنامەوانیدا، وەزارەتی خوێندنی باڵا و توێژینەوەی زانستی ئەنجامی زانکۆلاینی ڕاگەیاند، 54 هەزار و 278 پێشکەشکار لە زانکۆ و پەیمانگە حکومییەکان وەرگیران، 14 هەزار  و 731 کورسی بە بەتاڵی ماوەتەوە.

زانیاریی تایبەت: سەرچاوەیەک لە وەزارەتی خوێندنی باڵا، بە ئاڤای گوت، "ئامادەکارییەکان لە قۆناغی کۆتاییدان، لەچەند ڕۆژی داهاتوودا، دەرچووانی ناوچە کوردستانییەکانی دەرەوەی ئیدارەی هەرێمی کوردستان دەتوانن فۆڕمی وەرگرتن لە زانکۆ و پەیمانگەکانی هەرێمی کوردستان لەڕێگەی زانکۆلاین پڕبکەنەوە."

لەلایەکی دیکەوە: هەزار و 387 قوتابی بەهۆی کەمی نمرە و هەڵبژاردنی ئەو بەشانەی کە لەگەڵ نمرەکەیان ناگونجێت وەرنەگیراون، لە ماوەی هەفتەیەکدا لەڕێگەی پڕکردنەوەی پەڵپ دەتوانن داواکاری پێشکەش بکەن، بەسەر کورسییە بەتاڵەکان دابەش دەکرێن.