پەیامی وەزارەتی ناوخۆ لەبارەی ئەو هاونیشتمانیانەی لە لیبیا گیریان خواردووە

ئاڤا نیوز

وەزارەتی ناوخۆی هەرێمی کوردستان پەیامێک لەبارەی ئەو هاونیشتمانیانە بڵاودەکاتەوە کە لە لیبیا گیریان خواردووە و ڕایدەگەیێنێت: تیمێکی تایبەت بۆ گەڕانەوەیان ڕاسپێردراوە.

وێنە گەورەکە: لیبیا بووە بە یەکێک لە ڕێڕەوە دیارەکانی گەیشتن بە وڵاتانی ئەوروپا بە ڕێگەی نایاسایی، بەشێک لە گەنجانی هەرێمی کوردستان و وڵاتانی دیکەی ناوچەکە بۆ گەیشتن بە کەناراوەکانی ئیتاڵیا ڕێگای لیبیا بەکاردەهێنن، بەڵام لەلایەن هێزە ئەمنییەکان دەستگیر دەکرێن، ڕووبەڕووی دۆخی نەخوازراو و ئەشکەنجەدان و تەنانەت گیانلەدەستدان دەبنەوە.

ڕاگەیێنراوی فەرمی: وەزارەتی ناوخۆی حکومەتی هەرێمی کوردستان ڕایگەیاند: لەسەر ڕاسپاردەی مەسرور بارزانی، سەرۆکوەزیرانی کوردستان تایبەت بە هێنانەوەی ئەو گەنجانەی لە وڵاتی لیبیا گیریانخواردووە، خانەوادەکانیان دڵنیادەکەینەوە هەر لەسەرەتای بارودۆخەکەوە تیمێکی تایبەت لە وەزارەتە پەیوەندیدارەکانی حکومەتی هەرێمی کوردستان بەتایبەت هەردوو وەزارەتی ناوخۆ و فەرمانگەی پەیوەندیەکانی دەرەوە، ڕاسپێردراون بۆ تەواوکردنی سەرجەم ڕێکارەکانی ڕزگارکردنیان لە وڵاتی لیبیا و گەیاندنەوەیان بەسەلامەتی بۆ هەرێمی کوردستان.

- لێرەوە ئێوە دڵنیا دەکەینەوە لەماوەی هەفتەیەکدا پشتیوان بە خوا ڕێکارە پێویستەکان تەواو دەبن، ئەو گەنجانە دەگەنەوە هەرێمی کوردستان. داواش له دەزگاکانی ڕاگەیاندن دەکەین کە نەبنە هۆکاری بریندارکردنی هەستی خانەوادەی ئەو هاونیشتیمانیانە و هەواڵی بێ بنەما و دوور لە ڕاستی بڵاونەکەنەوە.

ئەوەی پێویستە بیزانیت: پێشتر د. ئەحمەد سەحاف، هەڵسوڕێنەری باڵیۆزخانەی عێراق لە لیبیا بە ئاڤای وت: 41 کۆچبەری کورد کە لە تەرابلوسی پایتەختی لیبیا دەستگیر کراون، تەواوی ڕێکارەکانی گەڕانەوەی ئارەزوومەندانەیان بۆ کراوە و هەماهەنگیمان لەگەڵ فەرمانگەی پەیوەندییەکانی دەرەوەی حکومەتی هەرێمی کوردستان و وەزارەتی ناوخۆ کردووە، تاوەکو بە سەلامەتی بگەڕێنرێنەوە نێو خێزانەکانیان.