مەسرور بارزانی: بەڵێنێکی دیکەمان بردەسەر

ئاڤا نیوز

 

سەرۆکوەزیران مەسرور بارزانی لەکاتی کردنەوەی دووسایدی گۆمەسپان - سماقووڵی کە ساڵێک پێش ئێستا بەردی بناغەی دانا ڕایگەیاند، "لێرەین بۆ ئەوەی بڵێین، کە بەڵێنێکی دیکەشمان جێبەجێ کرد". سەرۆکوەزیران گوتیشی، "سەرەڕای هەموو قەیران و ڕێگرییەکان، بەڵام ئێمە نەوەستاین بەردەوام بووین".

 

وێنە گەورەکە:  جووتسایدی گۆمەسپان – سماقوڵی، ڕێگایەکی ستراتیژییە و یەکێکە لە ڕێگا سەرەکییەکانی گەیاندنی پارێزگای هەولێر بە پارێزگای سلێمانی و ئیدارەی سەربەخۆی ڕاپەڕین.

 

لێدوانی فەرمی: سەرۆکوەزیران مەسرور بارزانی گوتی، دوای ساڵێک کە بەڵێنماندا ئەم پرۆژەیە دروست دەکەین، ئێستا ئێمە لێرەین کە بڵێین بەڵێنێکی دیکەمان جێبەجێ کرد، سەرەڕای هەموو ئەو قەیران و گرفتانەی بۆ هەرێمی کوردستان دروست دەکرێت، سەرەڕای ئەو هەموو گرفتانەی بۆ ئابووریی کوردستان دروست کران، ئێمە ئێستا وەستاوین بەرانبەر بە خەڵکی کوردستان و جیهان، کە پێیان بڵێین ئەگەر ئیرادەی بەهێز هەبێت و نیشتمانپەروەری بەهێز هەبێت، هیچ شتێک مەحاڵ نییە."

 

بەگوتەی سەرۆکوەزیران دووسایدی گۆمەسپان - سماقووڵی بەشێکە لە پرۆژەیەکی گەورەتر کە لە هەولێرەوە دەستپێدەکات و پایتەختی کوردستان بە پارێزگای سلێمانی و ئیدارەی ڕاپەڕین دەبەستێتەوە.

 

ئەوەی پێویستە بیزانیت؛ مەسرور بارزانی گوتیشی: ماستەرلانێکی گەورە دانراوە کە ئەم شوێنە ببێتە شوینێکی گەشتیاریی گرنگ، کە خەڵکی هەولێر و خەڵکی هەموو کوردستان سوودی لێبینن، خەونی ئێمەش ئەوەیە کوردستان بەتێکڕا ببێت بەشوێنێک کە هەم خەڵکی کوردستان و هەم ئەوانەی سەردانی ئێرە دەکەن سوودمەند بن."

 

مەسرور بارزانی داواشی لە شۆفێران کرد "ڕەچاوی ڕێنماییەکانی هاتووچۆ بکەن تاوەکو دووربن لە هەر ڕووداوێکی هاتووچۆ". 

 

زانیاریی زیاتر: دووسایدەکە 22 کیلۆمەترە، هەشت کیلۆمەتر ڕێگا لاوەکی و پێچی لەگەڵە و کۆی گشتیی درێژی جووتسایدەکە دەبێتە 30 كیلۆمەتر، شەش ژێرپرد و سێ بەرزە پردیشی لەخۆگرتووە و بڕگەکانی دیکەی وەک هێڵکاری و دانانی هێماکانی هاتووچۆ و پەرژینی ئاسنینی لەخۆگرتووە.

 

ئەمەش بزانە: پرۆژەکە لە لایەن کۆمپانیای ناوخۆیی هێمن گرووپ جێبەجێ کرا و لە سەرەتای دەستپێکردنی پڕۆژەکەوە 600 ئامێری جۆراوجۆر و دوو هەزار كرێكار و كارمەندی خۆماڵی کاریان تێدا کردووە.