خالید خۆشناو: لەماوەیەکی نزیکدا ڕێگای گۆمەسپان – کەسنەزان تەواو دەکەین

ئاڤا نیوز

خالید خۆشناو، سەرمایەداری نیشتمانی موژدەیەکی دیکە دەداتە هاونیشتمانیانی کوردستان، کە هەر لەماوەی ئەمساڵدا ڕێگای گۆمەسپان - کەسنەزان تەواو دەکرێت، کە ئەمەش کار ئاسانییەکی زۆر بۆ هاتووچۆکردن لە نێوان پارێزگای سلێمانی و هەولێر دەکات.


وێنە گەورەکە: سەرۆکوەزیران مەسرور بارزانی ڕۆژی یەکشەممە یەکێک لە شاکارەکانی کابینەی نۆیەمی حکومەتی هەرێمی کوردستانی پێشکەش بە هاونیشتمانیان کرد، ئەویش کردنەوەی ڕێگای دووسایدی گۆمەسپان – سماقووڵی بوو، کە ڕێگایەکی ستراتیژی گرنگە و درێژای 22 کیلۆمەتر لەگەڵ ڕێگای فریاگوزاری، ڕێگاکە لە ناوچەیەکی سەختدا دروستکراوە و کاری بڕینی زۆری تیادا ئەنجامدراوە، ئەمەش کار ئاسانی زۆر بۆ هاتووچۆی هاونیشتمانیانی دەڤەری پشدەر و بیتوێن و سلێمانی دەکات بۆ گەیشتنیان بە هەولێری پایتەخت.  

لێدوانی فەرمی: خالید خۆشناو، سەرمایەداری نیشتمانی و خاوەنی هێمن گرووپ لە مەراسیمی کردنەوەی دووسایدی سماقووڵی – گۆمەسپان، ڕایگەیاند: دروستکردنی ئەم ڕێگا تازەیە یەکێک لە سەخترین کارەکانمان بوو کە بە سەرکەتووی جێبەجێمان کرد. 

- بە تەواوبوونی ئەم ڕێگا ستراتیژییە ناوچەکە دەچێتە قۆناغێکی گرنگە و دەبێتە ناوەندێکی گەشتیاریی گرنگ بۆ شاری هەولێر و دەورووبەری. 

- لەماوەیەکی نزیکدا کارەکانی ڕێگای گۆمەسپان – کەسنەزانیش تەواو دەکەین و دەبێتە تەواوکەری دووسایدی سماقووڵی – گۆمەسپان. 

زانیاریی زیاتر: کردنەوەی ئەم ڕێگا ستراتیژییە کاریگەری زۆری دەبێت لەسەر بووژانەوەی کەرتی گەشتیاری لە ناوچەکە، بەهۆی ئەوەی لە دەورووبەری بەنداوی گۆمەسپان چەندین پڕۆژەی گەشتیاری زۆر گرنگ جێبەجێ دەکرین.