نێچیرڤان بارزانی خواستی پارتی لە هەڵبژاردنی ئەمجارە ئاشکرا دەکات

ئاڤا نیوز

جێگری سەرۆکی پارتی دیموکراتی کوردستان خواستی حیزبەکەی کە هەڵبژاردنی ئەمجارە ئاشکرا دەکات و دەڵێت، پارتی ئەمجارە دەیەوێت ببێتە حیزبی یەک ملیۆنی.

چیرۆکی سەرەکی: ئەمڕۆ یەکشەممە 19-10-2025، نێچیرڤان بارزانی، جێگری سەرۆکی پارتی دیموکراتی کوردستان، ئەمڕۆ لە شاری هەولێر لە کۆبوونەوەیەکدا لەگەڵ ڕێکخراوە جەماوەری و پیشەییەکانی پارتی، خواست و تموحی حیزبەکەی بۆ هەڵبژاردنی خولی شەشەمی پەرلەمانی عێراق ئاشکرا کرد و ڕایگەیاند، "دەمانەوێت یەک ملیۆن دەنگ بەدەستبهێنین."

پەیامی فەرمی: لە وتارێکدا نێچیرڤان بارزانی ڕایگەیاند، لاوان، قوتابیان و ئافرەتان هێزی تایبەتی پارتین و دەبێت کار لەسەر ئەوە بکرێت لە هەڵبژاردنی داهاتوودا، دەنگی پارتی بەرز بکرێتەوە بۆ یەک ملیۆن دەنگ.

جێگری سەرۆکی پارتی لە وتارەکەیدا گوتیشی: "لە هەڵبژاردنی ڕابردوو بە پشتیوانی گەنجان و لاوان پارتی سەرووی 800 هەزار دەنگی بەدەستهێنا، ئەمجارە دەبێت هیمەت بکەن بۆ ئەوەی پارتی ببێتە لیستی ملیۆنی لە عێراق."

نێچیرڤان بارزانی ئاماژەی بە چەند خاڵێکی سەرەکی کرد لەبارەی فەلسەفە و ئامانجەکانی پارتی:

٠ ئێمە وا فێرکراوین کوردستانی بوون ڕێبازە و پێکەوەژیان پەیاممانە.
٠ پارتی حیزبی گەنجانە و قەڵغانی پاراستنی کوردستانە.
٠ پارتی هێزی ئەمڕۆ و ئایندەی کوردستانە و خاوەن گەورەترین شانازی مێژووی هاوچەرخی کوردستانە.
٠ خەباتی پارتی ئەمڕۆ بە سیاسەتی نیشتمانی سەرۆک بارزانی بەهێزە.
٠ سەرۆک بارزانی ئێمەی فێرکردووە کە کوردستان ئامانجە و پارتی ئامرازە بۆ ئەو ئامانجە.
٠ پارتی دەیەوێت بە کردەوە سیستمی فیدڕالی لە عێراق جێبەجێ بکرێت.
٠ پارتی دەیەوێت دەستووری عێراق جێبەجێ بکرێت، چونکە جێبەجێ نەکراوە و فەرامۆشکراوە.