ترەمپ بۆ زێلینسکی: بە مەرجەکانی پووتین ڕازی ببە ئەگەرنا وڵاتەکەت وێران دەکات

ئاڤا نیوز

ڕۆژنامەی فاینانشیاڵ تایمزی بەریتانیا لە زاری سەرچاوەکانییەوە بڵاوی کردەوە کە لە کۆبوونەوەی نێوانیان، دۆناڵد ترەمپ، سەرۆکی ئەمریکا، گوشاری خستووەتە سەر ڤۆلۆدیمێر زێلینسکی، سەرۆکی ئۆکرانیا، بۆ ئەوەی بە مەرجەکانی ڕووسیا بۆ کۆتاییهێنان بە جەنگ ڕازی ببێت.

زانیاریی بەدەستهاتوو: بەپێی زانیارییەکانی ڕۆژنامەکە، ترەمپ هۆشداری داوە بە زێلینسکی کە ڤلادیمێر پووتین، سەرۆکی ڕووسیا، هەڕەشەی وێرانکردنی ئۆکرانیای کردووە ئەگەر مەرجەکانیان ڕەتبکاتەوە.

زانیاریی زیاتر: سەرچاوەکان ئەوەشیان بۆ ڕۆژنامەکە ئاشکرا کردووە، لە کۆبوونەوەکەی نێوان سەرۆکی ئەمریکا و ئۆکرانیا لە کۆشکی سپی چەند جارێک بەسەر یەکتردا دەنگیان بەرزکردووەتەوە و ترەمپیش چەند جارێک قسەی نەشیاوی بەکارهێناوە.

ئەوەی پێویستە بیزانیت: لە پەیوەندییە تەلەفۆنییەکەی ڕۆژی پێنجشەممە، پووتین پێشنیازێکی نوێی بۆ ترەمپ خستووەتەڕوو. بەپێی ئەم پێشنیازە، ئۆکرانیا دەبێت دەستبەرداری ئەو بەشانەی هەرێمی دۆنباس ببێت کە هێشتا لەژێر کۆنترۆڵی خۆیدان، لە بەرامبەردا ڕووسیا دەستبەرداری هەندێک ناوچەی بچووکی لە هەرێمەکانی خێرسۆن و زاپۆریژیا دەبێت.