ئاڤا نوێترین زانیاری لەبارەی تەواوبوونی پرۆسەی دابەشکردنی زەوی ئاشکرا دەکات

ئاڤا نیوز

پڕۆسەی دابەشکردنی زەوی بەسەر فەرمانبەران و خانەنشینان و پێشمەرگە و کارمەندانی وەزارەتی ناوخۆ لە دوایین قۆناغدایە، بەرپرسی بەشی یاسایی لە وەزارەتی شارەوانی و گەشتوگوزار دەڵێت 'ڕەزامەندی بۆ 480 هەزار فۆرمی زەوی لە ئەنجوومەنی وەزیران وەرگیراوە'.

وێنە گەورەکە: دوای ئەوەی بۆ ماوەی چەندین ساڵ بوو دابەشکردنی زەوی وەستابوو، کابینەی نۆیەمی حکومەتی هەرێمی کوردستان بڕیاریدا هەر فەرمانبەرێک ئەگەر مەرجەکانی پێدانی زەوی هەبێت، 200 مەتر زەوی پێ بدرێت.

لێدوانی فەرمی: سەربەست مەولوود، بەرپرسی بەشی یاسایی لە وەزارەتی شارەوانی و گەشتوگوزاری حکومەتی هەرێمی کوردستان بە ئاڤای ڕاگەیاند: نزیکەی 480 هەزار ڕەزامەندی تەرخانکردنی زەوی لە ئەنجوومەنی وەزیران گەڕاوەتەوە.

سەربەست مەولوود ئەمانەشی وت:

٠ ئێستا ڕەزامەندی ئەنجوومەنی وەزیران بۆ پێدانی زەوی بە شەش هەزار پێشمەرگە و خانەنشینی پێشمەرگە، کە زۆرینەیان لە یەکەی 70 و 80ـی پێشمەرگەن گەڕاوەتەوە.

٠ شەش هەزار ناوی (موتەفەریقە)، واتە ئەو ناوانەی کەموکوڕیان هەبووە، لە ئەنجوومەنی وەزیرانە و لەم دوو ڕۆژەدا ڕەزامەندی پێدانی زەوییان بۆ دەگەڕێتەوە.

٠ وەزارەتی ناوخۆ 370 ناو و بەڕێوەبەرایەتی گشتیی خانەنشینیش 500 ناوی نوێیان بۆ ناردووین، ئێستا پرۆسەی وردبینیان بۆ دەکەین، دواتر ئاراستەی ئەنجوومەنی وەزیرانی دەکەین، بۆ ئەوەی ڕەزامەندیان بۆ پێدانی زەوی پێبدرێت.

٠ وەزارەتی پێشمەگەش ئاگاداری کردووینەتەوە کە ژمارەیەک ناوی دیکەیان ماوە بینێرن تا زەویان پێبدرێت، بەڵام ژمارەکە دیار نییە چەندە و هێشتا بۆیان نەناردووین.

٠ تاوەکو ئێستا ڕەزامەندی لەسەر پێدانی 480 هەزار فۆرمی زەوی لە ئەنجوومەنی وەزیران هاتووەتەوە.

٠ ئەگەر تاوەکو هەفتەی داهاتوو پرۆسەی وردبینی تەواو بکەین، ئەوا نزیکەی هەزار ناوی دیکە بۆ ئەنجوومەنی وەزیران دەنێرین، بۆ ئەوەیە ڕەزامەندی پێدانی زەویان بۆ بکرێت.

٠ تاوەکو کۆتایی ساڵی 2025، وەک وەزارەتی شارەوانی سەرجەم ڕێکارە یاساییەکان و ڕەزامەندییەکان بۆ پێدانی زەوی تەواو دەکەین، ئەوەی دەمێنێتەوە لەلای شارەوانییەکان دەبێت، بۆ ئەوەی زەوی بە فەرمانبەران بدەن.