پارتی دوایین دەرفەت لەبارەی پێکهێنانی حکومەت بە یەکێتی دەدات

ئاڤا نیوز

ساڵێک بەسەر هەڵبژادنی پەرلەمانی کوردستان تێدەپەڕێت، تاوەکو ئێستا دەستەی سەرۆکایەتی پەرلەمان هەڵنەبژێردراوە و لایەنە براوەکانی هەڵبژاردن لەسەر یەکلایکردنەوەی پۆستەکان ڕێکنەکەوتوون، پارتی چەند پێشنیازێک بۆ یەکێتی دەکات و دوایین دەرفەتی پێدەدات.

چیرۆکی سەرەکی: ڕۆژی 20-10-2024 هەڵبژاردنی خولی شەشەمی پەرلەمانی کوردستان بەڕێوەچوو، لە کۆی 100 کورسی، 95 کورسی گشتی و 5 کورسی کۆتا، پارتی زۆرترین کورسی پەرلەمانی بەدەستهێنا کە 39 کورسی بوو، یەکێتی 23 کورسی، نەوەی نوێ 15 کورسی، یەکگرتووی ئیسلامی 7 کورسی، ڕەوتی هەڵوێست 4 کورسی، کۆمەڵی دادگەری سێ کورسی، بەرەی گەل دوو کورسی، هاوپەیمانی هەرێمی کوردستان یەک کورسی و گۆڕان یەک کورسی.

ئەوەی پێویستە بیزانیت: ڕۆژی 2-12-2024 یەکەم دانیشتن کرا، لەو دانیشتنەدا بۆ پۆستەکانی سەرۆک و جێگری سەرۆک و سکرتێری پەرلەمان 16 پەرلەمانتار لە یەکێتی و پارتی و نەوەی نوێ خۆیان کاندید کرد، بەڵام بەهۆی نەبوونی ڕێککەوتنی سیاسی دانیشتنەکە تەواو نەکرا، تاوەکو ئێستاش دانیشتن بە کراوەیی ماوەتەوە و بەهۆی نەبوونی ڕێککەوتنی سیاسیی دەستەی سەرۆکایەتی هەڵەبژێردراوە.

زانیاریی بەدەستهاتوو: ئاڤا زانیویەتی، پارتی دیموکراتی کوردستان و یەکێتی نیشتمانی کوردستان لەسەر بەرنامەی حکومەت ڕێککەوتوون، پارتی تاوەکو هەڵبژاردنی پەرلەمانی عێراق دەرفەتی بە یەکێتی داوە و کۆمەڵێک پێشنیازی بۆ کردوون، کە پۆستی سەرۆکی پەرلەمان، جێگری سەرۆکی حکومەت، جێگری سەرۆکی هەرێم و چەند وەزارەتێکی سیادی وەکو وەزارەتی دارایی و پێشمەرگە و چەند وەزارەتێکی دیکەی خزمەتگوزاری، ئەگەر تا ئەو وادەیە یەکێتی نەیەتە نێو حکومەت ئەوا پارتی ڕێگەی دووەم دەگرێتە بەر، کە دەتوانێت لەگەڵ لایەنەکانی دیکە و پێکهاتەکان کابینەی نوێی حکومەت ڕابگەیێنن.  

لەلایەکی دیکەوە: ڕۆژی شەممە سەرۆک بارزانی لەگەڵ مامۆستایانی ئایینی و ژمارەیەک لە پیاوانی ئایینییەکانی دیکەی کوردستان کۆبووەوە وتی "ئومێدەوارین حکومەتی کوردستان پێش هەڵبژاردنی پەرلەمانی عێراق پێکبێت و کاری جیدیش بۆ ئەم مەبەستە دەکرێت".