سیداد بارزانی: ڕۆژی هەڵبژاردن دەنگ بەو لایەنە بدەن كە دڵنیان بەرگریتان لێ دەكات

ئاڤا نیوز

سیداد بارزانی، ئەندامی مەكتەبی سیاسیی پارتی دیموكراتی كوردستان، داوا لە هاونیشتمانیان دەكات لە ڕۆژی دەنگدان بە ئەركی نیشتمانیی سەرشانیان هەڵسن و دەنگ بەو لایەنە بدەن كە دڵنیان بەرگریی لە مافەكانیان دەكات.

چیرۆكی سەرەكی: لە دەڤەری شێخان، پەردە لەسەر پەیكەری شەهید وەیسی بانی، شەهیدی ناسراوی كوردستان و سیمبولی بەرخودانی دەڤەری شێخان لادرا، سیداد بارزانی، ئەندامی مەكتەبی سیاسیی پارتی دیموكراتی كوردستان بە نوێنەرایەتی سەرۆك بارزانی لە مەراسیمەكە بەشداربوو.

لێدوانی فەرمی: سیداد بارزانی، لە لێدوانێكی ڕۆژنامەوانیدا وتی، ئەو پێكەوەژیانە ئایینی و نەتەوەییەی لە دەڤەری شێخان هەیە، ڕەنگدانەوە و نموونەیەكی ئاشكرای ئەو برایەتی و تەباییەیە كە لە سەرانسەری هەرێمی كوردستاندا هەیە.

سیداد بارزانی داوای لە هاونیشتمانیان كرد لە ڕۆژی دەنگدان، ئەركی نیشتمانیی سەرشانیان بەجێ بگەیەنن و بچنە سەر سندووقەكانی دەنگدان و دەنگی خۆیان بەو لایەنە بدەن كە دڵنیان بەرگری لە مافەكانیان و كەڕامەتیان دەكات.

بایۆگرافی: شەهید وەیسی بانی، سیمبولی خەبات و بەرخودانی كوردستانە كە هەر لەگەڵ گەڕانەوەی بارزانی نەمر لە یەكێتی سۆڤیەت، خۆی و چەندین كەسایەتیی عەشیرەتی مزووری سەردانی بەغدایان كرد و چوونە پێشوازیی بارزانی نەمر و هەر لەوێ بەڵێنی هاوخەباتی و تێكۆشانیان پێدا، تا ئەوەی لە 19-10-1978 گیانی خۆی پێشكەشی نیشتمان و خەباتی ڕەوای ڕزگاریخوازی كورد كرد.