یانەی نەورۆز داوای بەهاناوەچوون دەکات

ئاڤا نیوز

دوای دەستگیرکردنی لاهوور شێخ جەنگی، دۆخی دارایی یانەی نەورۆز بەرەو لێواری داڕووخان چووە و ئێستا داوای بەهاناوە چوون دەکەن. 

 وێنە گەورەکە:  یانەی نەورۆز لە شاری سلێمانی، پێشتر لەلایەن لاهوور شێخ جەنگی، سەرۆکی یانەکە پاڵپشتی دارایی دەکرا، بەڵام لە دوای ئەوەی  لە 22-8-2025، لەلایەن دژەتیرۆر، کۆماندۆ و ئاسایشی یەکێتی هێرش کرایە سەر لالەزار و لاهوور شێخ جەنگی دەستگیرکرا، یانەکە دووچاری قەیرانی دارایی گەورە بووەتەوە، ئێستا داوای هاوکاری لە هاندەرانی یانەکە و کەسایەتییەکان دەکەن تاوەکو لەم دۆخە داراییە ڕزگارییان بکەن.

لێدوانی فەرمی: هێرش هەورامی، جێگری سەرۆکی یانەی نەورۆز بە ئاڤا میدیای گوت: یانەکەمان دووچاری بارودۆخێکی دارایی سەخت بووەتەوە، زیاتر لە 40 ڕۆژە یاریزانەکان مووچەیان وەرنەگرتووە، پارەی بۆندی یاریزانەکان نەدراوە، یانەکە لە خراپترین دۆخی داراییە.

- نووسراوی فەرمیمان بۆ یەکێتی تۆپی پێی عێراقی و لایەنە پەیوەندیدارەکان لە عێراق و هەرێمی کوردستان کردووە، نووسراومان بۆ محەممەد شیاع سوودانی، سەرۆکوەزیرانی عێراقیش کردووە، بەڵام تا ئێستا هیچ وەڵامێکمان وەرنەگرتووە.

- بەردەوام بوونمان لە خولی ئەستێرەکانی عێراق بەم دۆخە داراییە سەختە زۆر ئەستەمە، داوا دەکەین هاوکاری یانەکە بکرێت و یانەی نەورۆز لەو دۆخە داراییە سەختە ڕزگار بکرێت.

ئەوەی ئێستا ڕوودەدات: یانەی وەرزشی نەورۆز داوا لە هاونیشتمانیانی دەرەوە و ناوەوەی وڵات دەکات، بۆ درێژەدان بە کاروانی وەرزشی پێویستیان بە هاوکارییە، بۆ نەکوژاندنەوەی مەشخەڵی ئاگری نەورۆز یانەکە. 

زانیاری زیاتر : یانەی نەورۆز هێڵێکی گەرمی داناوە بۆ ئەو کەسانەی خوازیاره‌ هاوكاری ڕاسته‌وخۆ بگەیەنن بە یانەکە کە ئەمە ژمارەکەیە 07701570883.

باکگراوند: پێش هێرشەکەی سەر لالەزار، سەرۆکی یانەی نەورۆز بڕی دوو ملیۆن و 400 هەزار دۆلاری بۆ خەرجی ئەم وەرزەی یانەکە تەرخان کردبوو، بەڵام پارەکە نەخرابووە سەر هەژماری بانکی و نازانرێت لەکاتی ڕووداوەکەی لالەزار پارەکە چی بەسەرهاتووە.

ئەمەش بزانە:  ئەم بارودۆخەی یانەی نەورۆز کاریگەریی راستەوخۆی لەسەر ئەنجامەکانی یانەکە دروست کردووە لە چوار یاری یەکەمی ئەمساڵی خولی ئەستێرەکانی عێراق، یانەی نەورۆز سێ یاری دۆڕاندووە و تەنیا یەک یاری بردووەتەوە، شەش گۆڵی کردووە، 11 گۆڵی لەسەر تۆمار کراوە و لە ڕیزبەندی 14ەهەم دێت، بەردەوامبوونی ئەو دۆخە داراییەی یانەکەش ئەگەر چارەسەر نەکرێت مەترسی ئەوەی لێدەکرێت یانەکە چیتر نەتوانێت لەسەر پێی خۆی بوەستێت و نەتوانێت بەردەوام بێت لە خولی ئەستێرەکانی عێراق، ڕەنگە تاکە نوێنەرەکەی پارێزگای سلێمانی لەو خولە بکشێتەوە.