دیداری ئاڵوگۆڕی ئەزموون لە نێوان كوردستان و ئیمارات ڕێکدەخرێت

ئاڤا نیوز

سبەی لە هەولێری پایتەخت، دیداری ئاڵوگۆڕی ئەزموون لەنێوان هەرێمی كوردستان و ئیمارات ڕێکدەخرێت و پلاتفۆرمێک بە فەرمی ڕادەگەیەنرێت.

چیرۆکی سەرەکی: سبەی سێشەممە بڕیارە شاندێکی وڵاتی ئیمارات کە چوار وەزیری ئەو وڵاتەیان لەگەڵ بێنە هەولێر، دواتر دیدارێک بەڕێوەدەچێت کە دوو پانێڵ و کۆبوونەوەی نۆ تیمی جیاوازی تێدا دەبێت،  پێشنیاز ئاڵوگۆڕ دەکەن و دەستپێشخەرییەکی نوێ ڕادەگەیێنرێت.

زانیاریی زیاتر: دیدارەکە کاریگەی هەیە لەسەر پێشخستنی تواناکانی حکومەتی هەرێمی کوردستان لەبواری بەدیجتاڵیکردنی کاروبارەکانی، چونکە حکومەتی ئیمارات ئەزموونێکی درێژخایەن و باشی هەیە لەوبوارەدا. 

ئەمەش بزانە: هەرێمی کوردستان یادەشتی لێکتێگەیشتنی لەوبارە لەگەڵ ئەو وڵاتە واژۆکردووە و دەیەوێت ئەزموونی ئەوان بگوازێتەوە و سوودی لێوەربگرێت بۆ کەمکردنەوەی ڕۆتین و خێرا بەڕێکردنی مامەڵەی هاونیشتمانیان. 

ئەوەی پێویستە بیزانیت: لەمیانەی دیدارەکەدا پلاتفۆرمێک بەفەرمی ڕادەگەیەنرێت بۆ هەڵسەنگاندنی ئەدای حکومەتی هەرێمی کوردستان، پلاتفۆرمەکە بە هەماهەنگی حکومەتی ئیمارات دروست کراوە، بۆ پێشخستنی کارەکانی حکومەت و هەڵسەنگاندنی ئەدای دامەزراوە حکومییەکان.

هاوکات نوێنەرانی کوردستان و ئیمارات  جگە لە بەدیجیتاڵکردنی کاروباری حکومەت، گفتوگۆ لەسەر چەند بوارێکی تریش دەکەن: وەبەرهێنان و ئابووری، تەندروستی، گۆڕانی کەشوهەوا، لۆجیستی و فڕۆکەوانی.