وەزارەتی خوێندنی باڵا سێ مانگ مۆڵەت بە قوتابییانی تازە وەرگیراو دەدات

ئاڤا نیوز

وەزارەتی خوێندنی باڵا و توێژینەوەی زانستی ماوەی سێ مانگ دەدات بە قوتابییانی تازە وەرگیراو لە زانکۆ و پەیمانگەکان بۆ دروستکردنی ژمارەی کەسیی بێ هاوتا (UPN) کە لە بانکەکان دروست دەکرێت.

وێنە گەورەکە: ژمارەی کەسیی بێ هاوتا (UPN) ناسێنەرێکی تایبەتی (13) ژمارەییە، بۆ هەموو تاکێک لە هەرێمی کوردستان دیاری کراوە، ئەم ناسنامەیە دەروازەیەکە بۆدەستڕاگەیشتن بە هەموو خزمەتگوزارییە دیجیتاڵییەکانی حکومەتی هەرێمی کوردستان.

ڕاگەیێنراوی فەرمی: وەزارەتی خوێندنی باڵا و توێژینەوەی زانستی بڵاویکردووەتەوە: لە پێناو بەرژەوەندى گشتیی قوتابییان و ڕایکردنى مامەڵەکانیان بەشێوەیەکى خێرا و دروست نەبوونى قەرەباڵغی و بەربەست بۆیان، بە فەرمانى د.ئارام محمد قادر، وەزیرى خوێندنى باڵا و توێژینەوەى زانستى بڕیاردرا؛ بە پێدانى ماوەى سێ مانگ مۆڵەت بۆ وەرگرتنى ژمارەى کەسیی بێ هاوتا (UPN) لەلایەن قوتابییانى تازە وەرگیراوى زانکۆکان لە سەنتەرەکانى بایۆمەترى و تۆمارکردنیام لە سیستمى ئەلیکترۆنى (ZANKO) بەمەبەستى خۆتۆمارکردن.

ئەمەش بزانە: هەموو هاونیشتمانییەک ژمارەی کەسیی بێ هاوتا  (UPN)ـی خۆی دەبێت، ژمارەی هیچ کەس لە کەسی دیکە ناچێت و دووبارەی تیدا نییە، هیچ کەسیش ناتوانێت دوو ژمارەی کەسیی بێ هاوتا (UPN) هەبێت.