نزیکەی 11 ملیار دینار بۆ تووشبووانی تالاسیمیا خەرج دەکرێت

ئاڤا نیوز

لەسەر ڕاسپاردەی سەرۆکوەزیران مەسرور بارزانی، تووشبووانی تالاسیمیا ڕەوانەی وڵاتەکانی تورکیا و هیندیستان دەکرێن و چارەسەری وەردەگرن.

چیرۆکی سەرەکی: بەرەبەیانی ئەمرۆ سێشەممە 21-10-2025، لەسەر فەرمانی مەسرور بارزانی، سەرۆکوەزیرانی کوردستان، کاروانی سێیەمی نەخۆشانی تالاسیمیا بۆ نەشتەرگەری چاندنی مووخی ئێسک لەڕێگەی فڕۆکەخانەی نێودەوڵەتیی هەولێرەوە ڕەوانەی دەرەوەی وڵات کران.

لێدوانی فەرمی: سامان بەرزنجی، وەزیری تەندروستیی حکومەتی هەرێمی کوردستان بە ئاڤای ڕاگەیاند: دوای پشکنین و ئامادەکارییە پزیشکی و ڕێککارە زانستییەکان، 48 هاووڵاتیی هەرێمی کوردستان کە پێکهاتوون لە نەخۆشانی تالاسیمیا، بەخشەران و هاوەڵەکانیانن بۆ نەشتەرگەری چاندنی مووخی ئێسک، لەلایەن وەزارەتی تەندروستییەوە ڕەوانەی دەرەوەی وڵات کران، تەواوی خەرجییەکانی چوون و هاتنەوەیان، مانەوە و پشکنین، نەشتەرگەری و چارەسەرەکانیان بودجەی پێویستی بۆ دابینکراوە.

ئەوەی پێویستە بیزانیت: لەم چوارچێوەیەدا حکومەتی هەرێمی کوردستان 140 توشبووی تالاسیمیا دەنێرێتە وڵاتانی دەرەوە و بودجەی تەواو بۆ نەشتەرگەری، مانەوە دابین دەکات کە نزیکەی 11 ملیار دینارە، نەخۆشخانەکانیش دەنێردرێنە ژمارەیەک نەخۆشخانەی خاوەن متمانەی نێودەوڵەتیی  JCI لە وڵاتەکانی تورکیا و هیندستان. لە ئێستادا 120 هاووڵاتی لە نەخۆشخانەکانن، لە ڕۆژانی داهاتووشدا کاروانی چوارەم 60 نەخۆش و هاوەڵەکانیان ڕەوانەی دەرەوەی وڵات دەکرێن.