دوای 11 ساڵ شەقامی مام جەلال لە کۆیە قیرتاو کرا؛ کۆمپانیایەکی کەرتی تایبەت کردوویەتی

ئاڤا نیوز

پڕۆژەی شەقامی مام جەلال لە شاری کۆیە، کە بۆ ماوەی زیاتر لە یازدە ساڵ بە نیوەچڵی جێهێڵرابوو و ببووە مایەی بێزارییەکی زۆر بۆ دانیشتووانی ناوچەکە، لە کۆتاییدا و لەلایەن کۆمپانیایەکی کەرتی تایبەتەوە تەواو کرا.

 

چیرۆکی سەرەکی؛ ئەم شەقامە کە درێژییەکەی شەش کیلۆمەترە، بڕیار بوو لە ماوەی 550 ڕۆژدا، واتە کەمتر لە دوو ساڵ، تەواو بکرێت و بودجەیەکی بە بڕی شەش ملیار و 112 ملیۆن دیناری بۆ تەرخان کرابوو. بەڵام بەهۆی گرفت و کەمتەرخەمییەوە، پڕۆژەکە بۆ ماوەی یازدە ساڵ دواکەوت.

زانیاریی زیاتر؛ بە درێژایی ئەو ساڵانە، کاری جێبەجێکردن بە شێوەیەکی پچڕپچڕ بەڕێوەدەچوو. دانیشتووانی کۆیە شایەتحاڵی ئەوە بوون کە ماوە ماوە ئامێر و کەلوپەلی کارکردن دەهێنرانە سەر شەقامەکە و کەمێک کاری تێدا دەکرا، بەڵام دوای ماوەیەکی کورت، ئامێرەکان بە بێدەنگی ون دەبوون و پڕۆژەکە دیسانەوە دەوەستایەوە.

جێهێشتنی شەقامەکە بە شێوەی خۆڵ و تەپوتۆز، بۆ ساڵانێکی زۆر بووبووە هۆی مەینەتی بۆ خەڵکی ناوچەکە. دواکەوتنی زۆری پڕۆژەکە وای کرد کە ناوەکەشی بگۆڕدرێت و ناوی نرا "شەقامی فیدراڵی".

ئەوەی پێویستە بیزانیت؛ بەڵام ئێستا کە کۆمپانیەکی کەرتی تایبەت بەخۆڕایی پڕۆژەکەی تەواو کردووە، دانیشتووانی دەڤەرەکە وەک ڕێزێک بۆ ناوی کۆنی شەقامەکە، هەر بە "شەقامی مام جەلال" ناوی دەبەن.

 

هەنگاوی داهاتوو؛ بڕیار وایە لە چەند ڕۆژی داهاتوودا شەقامەکە بە فەرمی بە ڕووی هاووڵاتییاندا بکرێتەوە.