لە سەردانێکی "ڕانەگەیێنراودا" قائانی لە بەغدایە؛ لەگەڵ سەرکردە سیاسی و چەکدارەکان کۆدەبێتەوە

ئاڤا نیوز

فه‌رمانده‌ی فه‌یله‌قی قودسی سوپای پاسدارانی ئێران، لە سەردانێکی نهێنیدا گەیشتە بەغدا و زنجیرەیەک کۆبوونەوەی لەگەڵ سەرکردە سیاسی و چەکدارە عێراقییەکان ئەنجامدا. ئەم سەردانە لە کاتێکدایە کە ناوچەکە گرژی بەخۆوە دەبینێت و باس لە کاریگەری ئێران لەسەر دۆخی عێراق دەکرێت.

 

زانیاریی بەدەستهاتوو: بەگوێرەی سەرچاوەیەکی سیاسی ئاگادار کە قسەی بۆ میدیای عێراق کردووە، ڕاگەیاند: "قائانی ئەمڕۆ گەیشتە بەغدا و لەوێ لەگەڵ ژمارەیەک لە سەرکردەکانی هێزە سیاسییە شیعەکان و گرووپە چەکدارەکان کۆبووەوە، لە سەردانێکدا کە سروشتی ڕوون نییە". هەروەها ئاماژەی بەوە نەکرد کە قائانی لەگەڵ کام سەرکردە کۆبووەتەوە.

 

ئەوەی لەبارەیەوە دەگوترێت؛ بەگوێرەی چەند سەرچاوەیەکی سیاسی ناکۆکییەکان لەناو چوارچێوەی هەماهەنگی پەرەیان سەندووە، ئەمەش پەیوەندی بە بەکارهێنانی سەرچاوەکانی دەوڵەت و کاریگەری سیاسی لە بانگەشەی هەڵبژاردندا بۆ بەرژەوەندیی ژمارەیەک لە لیستەکانی ناو چوارچێوەکە هەیە، لە کاتێکدا لایەنە ئێرانییەکان هاتبوونە سەر خەت بۆ نێوەندگیری و کۆنترۆڵکردنی گرژییەکان.

 

ئەوەی پێویستە بیزانیت: ئەمە یەکەم سەردانی نهێنی ئیسماعیل قائانی، فه‌رمانده‌ی فه‌یله‌قی قودسی سوپای پاسدارانی ئێران بۆ عێراق نییە، بەڵکو لەدوای هێرشەکانی ئیسرائیل بۆ سەر ئێران، چەند جارێکی دیکە قائانی بە نهێنی سەردانی عێراقی کردووە و لەگەڵ بەرپرسانی باڵای عێراق کۆبووەتەوە.