بەریتانیا گرووپی تەحریر شام لە لیستی تیرۆر دەردەهێنێت

ئاڤا نیوز

 

بەریتانیا دەڵێت، هۆی ئەو گۆڕانکارییانەی لە تەحریر شام ڕوویداوە بڕیاریانداوە ئەو گرووپە لە لیستی تیرۆر دەریبهێنن.

 

ئەوەی پێویستە بیزانیت؛ لە ساڵی 2017 بەریتانیا گرووپی چەکداری تەحریر شامی وەک بەشێک لە قاعیدە خستبووە لیستی تیرۆرەوە.

 

ڕاگەیێنراوی فەرمی: حکومەتی بەریتانیا ڕایگەیاند، بڕیارمانداوە گرووپی تەحریر شام لە لیستی ڕێکخراوە تیرۆریستییە قەدەغەکراوەکان دەربهێنین، ئەم بریارەش دوای لێکۆڵینەوەیەکی ورد لەلایەن وەزارەتەکانمانەوە دراوە، بەم هەنگاوەش بەریتانیا پەیوەندییەکی نزیکتر لەگەڵ حکومەتی نوێی سووریا دروست دەکات.

 

بەریتانیا دەشڵێت، بڕیارەکەمان پشتگیری لە کارە لەپێشینەکانی وەزارەتی دەرەوە و ناوخۆی بەریتانیا دەکات، لەوانەش بەرەنگاربوونەوەی تیرۆر، کۆچبەران و لەناوبردنی چەکی کیمیایی.

 

ئەوەی پێویستە بیزانیت: دەرهێنانی گرووپەکە لە لیستەکەدا، بەشێکە لە وەڵامی بەریتانیا بۆ ئەو گۆڕانکارییە گەورانەی لە سووریا ڕوویانداوە لەوکاتەوەی  هێزەکانی ئەحمەد شەرع ڕژێمی ئەسەدیان لە مانگی 12ی ڕابردوو ڕووخاند.

 

بەریتانیا جەخت لەوەشدەکاتەوە، هێشتا داعش هەڕەشەیەکی گەورەیە لەسەر سووریا و دەرکردنی ڕێکخراوەکە لە لیستی تیرۆر پشتیوانی لە هەوڵەکانی حکومەتی سووریا دەکات لە ڕووبەڕووبوونەوەی داعشدا. دەشڵێت، پێشوازی لە هەوڵەکانی حکومەتی نوێی سووریا دەکەن بۆ لەناوبردنی بەرنامەی چەکی کیمیایی ڕژێمی ئەسەد لە سووریا.