ماوەی ئەرکی سوپای تورکیا لە باشوور و ڕۆژئاوای کوردستان بۆ 3 ساڵ درێژکرایەوە

ئاڤا نیوز

پەرلەمانی تورکیا ئەو پڕۆژە یاسایانەی پەسەند کرد کە تایبەت بوون بە درێژکردنەوەی ماوەی ئەرکی سوپای وڵاتەکەی لە باشوور و ڕۆژئاوای کوردستان بۆ ماوەی 3 ساڵ. پێشتریش دەم پارتی نیگەرانی خۆی دەربڕیبوو و جەختی لەوە کردبووەوە کە ئەم درێژکردنەوەیە خزمەت بە پرۆسەی ئاشتی ناکات.

 

بڵاوکراوەی فەرمی: پەرلەمانی تورکیا ڕایگەیاند، یاداشتی سەرۆکایەتی بۆ درێژکردنەوەی ئەرکی سەربازانی تورکیا لە عێراق و سووریا بۆ ماوەی 3 ساڵ و لە لوبنانیش بۆ ماوەی 2 ساڵی دیکە درێژکردەوە.

 

زانیاریی زیاتر: درێژکردنەوەی ئەرکی هێزەکانی تورکیا لە لوبنان بۆ ماوەی 2 ساڵ لە چوارچێوەی هێزی کاتیی نەتەوەیەکگرتووەکانە (UNIFIL) لەو وڵاتە.

 

بەگوێرەی پڕۆژە یاسایەکی سەرۆکایەتیی تورکیا کە پەیوەستە بە درێژکردنەوەی ئەرکی سوپای تورکیا لە عێراق و سووریا. ئاماژە بە چەند خاڵێک کراوە کە پێویستیی درێژکردنەوەی ئەرکەکە دەردەخەن، لەوانە:

• بوونی هەڕەشە لە ئاسایشی نەتەوەیی تورکیا لەسەر سنوورەکان و لەناو وڵاتدا.
• چالاکییەکانی (PKK/PYD-YPG) و داعش کە هەڕەشە لە ئاسایش و یەکپارچەیی خاکی تورکیا دەکەن.
•  پاراستنی بەرژەوەندییەکانی تورکیا لە ناوچەکە و دابینکردنی ئاسایشی هاووڵاتییان.
• پێویستیی بەردەوامبوونی ئۆپەراسیۆنە سەربازییەکان لە دژی گرووپە تیرۆریستییەکان.
• لابردنی مەترسییەکان لەسەر ڕێگا بازرگانییەکان و پاراستنی ژیانی هاووڵاتییان.

 

ئەوەی پێویستە بیزانیت: پێش پرۆسەی دەنگدانەکە ڕۆژی سێشەممە تولای هاتیمئۆغوڵڵاری، هاوسەرۆکی گشتیی دەم پارتی داوای کردبوو، لەبری درێژکردنەوەی ماوەی مانەوەی سەربازانی تورکیا لە باشوور و ڕۆژئاوای کوردستان، تورکیا نیازپاکی خۆی نیشان بدات و زەمینەی یاسایی بۆ سەرخستنی پرۆسەی ئاشتی بڕەخسێنێت.