لە شەڕی عێراق و ئێراندا 52 هەزار سەرباز بێسەروشوێنن

ئاڤا نیوز

لیژنەی خاچی سووری نێودەوڵەتیی دەڵێت، 52 هەزار سەربازی شەڕی هەشت ساڵەی نێوان عێراق و ئێران تائێستاش بێسەروشوێنن و هەوڵەکانی ڕێکخراوەکەیان لەگەڵ بەغدا و واشنتن بۆ ئاشکراکردنی چارەنووسی ئەو کەسانە بەردەوامە، داواش دەکەن هەوڵەکان زیاتر چڕبکرێنەوە.

ئەوەی پێویستە بیزانیت: جەنگی هەشت ساڵەی عێراق و ئێران (ئەیلوولی ساڵی 1980 تا ئابی 1988) بە یەکێک لە درێژترین جەنگەکانی سەدەی بیست دادەنرێت، ژمارەی ئەوانەی لەم شەڕەدا کوژران بە ملیۆنێک مرۆڤ مەزەندە دەکرێت و زیانی شەڕەکەش بە 400 ملیار دۆلار خەمڵێنراوە، شەڕەکە بەبێ سەرکەوتنی هیچ لایەک کۆتاییهات و هەردوولا بە ڕاگەیاندنی ئاگربەست ڕازیی بوون.

لێدوانی فەرمی: هبە عەدنان، وتەبێژی لیژنەی خاچی سووری نێودەوڵەتی لە عێراق بە ڕۆژنامەی سەباحی ڕاگەیاندووە، لە ساڵی 2008ەوە ڕێکخراوەکەیان لەگەڵ بەغدا و واشنتن کار لەسەر دۆسیەی بێسەروشوێن و ئاڵوگۆڕی ڕووفاتەکان و ناسینەوەیان دەکات، کۆتا ئاڵوگۆڕی ڕووفاتەکانیش 5ی ئەم مانگە بوو کە  70 سەربازی عێراقیی و 48 سەربازی ئێرانی ڕادەستی وڵاتەکانیان کرانەوە کە لە شەڕی هەشت ساڵەی نێوان هەردوو وڵاتدا بێسەروشوێن ببوون، پرۆسەکەش دوای ڕێکارەکانی تایبەت بە ناسینەوەی ناسنامەکانیان ئەنجام دراوە.

دەشڵێت، دیارترین ئاستەنگی بەردەم کارەکانیان ئەوەیە ڕووفاتەکان کەوتوونەتە شوێنی زۆر دوورە دەست یان کەوتوونەتە ناوچەیەک کە مەترسی پاشماوەی جەنگی لێماوە، هەروەها یەک ئاماری ناوەندی تایبەت بە بێسەروشوێنان لە عێراقدا نییە، ئەوەش وایکردووە بەراوردکردنی زانیارییەکان و ناسیانەوەی ناسمانەی ڕووفاتەکان بە وردی کارێکی سەخت بێت.