سەرۆکوەزیران مەسرور بارزانی نەخۆشخانەی 100 قەرەوێڵەیی ئامێدی کردەوە

ئاڤا نیوز

لەچوارچێوەی درێژەدان بە کاروانی ئاوەدانی کوردستان، سەرۆکوەزیران مەسرور بارزانی، نەخۆشخانەی 100 قەرەوێڵەیی لە قەزای ئامێدی کردەوە، کە بە بەرزترین و پێشکەوتووترین شێوازی سەردەمیانە دروستکراوە.

چیرۆکی سەرەکی: نەخۆشخانەی 100 قەرەوێڵەیی شۆرش – هێتیت لە کۆمەڵگای هێتیت لە ناحیەی دێرەلووکی قەزای ئامێدی، نەخۆشخانەیەکی گشتییە و بە گوژمەی 43 ملیۆن دۆلار بە ستانداردی جیهانی بۆ خزمەتی هاونیشتمانییانی ئەو سنوورە دروستکراوە.

لێدوانی فەرمی: وارشین سلێمان، قائیمقامی قەزای ئامێدی بە ئاڤا میدیای گوت: تەواوی ئامێر و پێداویستییە پزیشکییەکان و پزیشک و کارمەندانی تەندروستی بۆ نەخۆشخانەکە دابین کراوە، تاوەکو ڕاستەوخۆ بکەوێتە خزمەت هاونیشتمانیان.

زانیاریی زیاتر: نەخۆشخانەکە لەسەر ڕووبەری 43 هەزار مەتر چوارگۆشە دروست کراوە، هاوکات باڵەخانە و تەواوی بەشەکانی 21 هەزار مەتر چوارگۆشەیان لەو ڕووبەرە داگیر کردووە و ئەوەی دەمێنێتەوە بۆ سەوزای و شوێنی ڕاگرتنی ئۆتۆمبێل تەرخان کراوە. 

ئەمەش بزانە: نەخۆشخانەکە پێکهاتووە لەم بەشانە:- فریاکەوتن، چارەسەری سرووشتی، نۆرینگەی دەرەکی، تاقیگە، بانکی خوێن، منداڵان، ژنان و لەدایکبوون، تیشک و سۆنار، نەشتەرگەری، دەرمانخانە، شوشتنی گورچیلە، بەشی تەکنیکی، یەکەی چارەسەر کردنی ئاوی پیس، شوێنی مانەوەی پزیشکەکان، بەشەکانی کارگێڕی و خزمەتگوزاری.