پیاوێکی بەتەمەن لە هەولێر 20 ڕۆژە لەسەر شەقامەکان دەژی

ئاڤا نیوز

 

پیاوێکی بەتەمەن، کە ماوەی 20 ڕۆژ بوو لەسەر پارچە زەوییەک لەسەر جووتسایدی سەیداوە لە هەولێر لە دۆخێکی تەندروستی و ژینگەیی خراپدا دەژیا، پاش هەوڵەکانی پارێزگاری هەولێر گواسترایەوە بۆ نەخۆشخانە.

 

ئەوەی پێویستە بیزانیت؛ بەپێی زانیارییەکانی پەیامنێری ئاڤا، عوبێد هەرکی، کە سەردانی شوێنەکەی کردبوو، ئەم پیاوە بەتەمەنە بۆ ماوەی 20 ڕۆژ لەو شوێنە مابووەوە و لەلایەن دووکاندار و خەڵکی ناوچەکەوە خواردن و ئاوی پێدەدرا. دۆخی ژیانی ناهەموار بوو، بەجۆرێک کە زبڵ و خاشاکێکی زۆر لە دەوروبەری کۆببووەوە و تەندروستیی لە مەترسیدا بوو.

زانیاریی زیاتر؛ سەرەڕای هەوڵەکانی پەیامنێرەکە بۆ زانینی چیرۆکەکەی، پیاوەکە زۆر کەم قسەی کردووە و تەنها ئەوەی وتووە: "ماڵم لە سەیداوەیە و ماوەی 21 ساڵە لە ماڵەوە دەرکراوم."

دوای ئاگادارکردنەوەی پارێزگاری هەولێر، ئومێد خۆشناو، دەستبەجێ تیمی تایبەتی ناردە شوێنی ڕووداوەکە. تیمەکە بە ئەمبوڵانس پیاوەکەیان گواستەوە بۆ نەخۆشخانە بەمەبەستی ئەنجامدانی پشکنینی پزیشکی و دەروونی، تاوەکو دواتر ڕێکاری پێویستی بۆ بگیرێتەبەر و چارەسەری گونجاوی بۆ دابین بکرێت.