لە سەرێ کانی و گرێ سپی دەنگدان بۆ پەرلەمانی سووریا بەڕێوەدەچێت

ئاڤا نیوز

سبەی پێنجشەممە، 23ـی تشرینی یەکەم، پرۆسەی هەڵبژاردنەکانی ئەنجوومەنی گەل لە سووریا لە شارەکانی سەرێ کانی و گرێ سپی و هاوکات لە بارەگای ئەنجوومەنی گەل لە دیمەشق، دەستپێدەکات.

چیرۆکی سەرەکی: ڕۆژی 05-10-2025، بە بەشداری نزیکەی حەوت هەزار ئەندامی دەستەی دەنگدەران و هەزار و 578 کاندید، یەکەمین هەڵبژاردنی پەرلەمان لە دوای ڕووخانی دەسەڵاتەکەی ئەسەد لە سووریا بەڕێوەچوو. بەڵام لە چەند ناوچەیەک هەڵبژاردنەکە بە هۆکاری جیاواز نەکرا.

بڵاوکراوەی فەرمی: نەوار نەجمە، وتەبێژی دەستەی هەڵبژاردنەکانی سووریا لە پۆستێکدا لە هەژماری تایبەتی خۆی لە "ئێکس" ڕایگەیاند، "سبەی پێنجشەممە 23ـی تشرینی یەکەم، لە سەرێ کانی و گرێ سپی و بارەگای ئەنجوومەنی گەل لە دیمەشق، ھەڵبژاردنەکانی ئەنجوومەنی گەل تەواو دەکرێن."

ئەوەی پێویستە بیزانیت: ئەم هەڵبژاردنانە دوای زیاتر لە 15 ڕۆژ دێت لە هەڵبژاردنە گشتییەکە، ئەوکات هەڵبژاردن لەو دوو ناوچەیە نەکرا. هاوکات بەهۆکاری نەگونجاوی دۆخەکەش لەڕووی ئەمنیی و لۆجستییەوە هەڵبژاردن لە پارێزگاکانی ڕەققە، حەسەکە و سوەیدا بۆ کاتێکی دیکە دواخراون، ئەم سێ پارێزگایەش پێکەوە خاوەنی 19 کورسین لەو 140 کورسییەی بە هەڵبژاردن دیاریی دەکرێن.

ئەمەش بزانە: پەرلەمانی نوێی سووریا لە 210 ئەندام پێکدێت، لەو ژمارەیەش 140 کورسیی بە دەنگدانی دەستەی دەنگدەران دیاری دەکرێن و 70 پەرلەمانتارەکەی دیکەش لەلایەن سەرۆککۆماری سووریاوە دیاریی دەکرێن.